Lasenai 94 - Ngudradreadrekadhane Ka Sisiu 魯凱語聖經

Amani ku lri saibange ki umawmase ka Twaumase

¹ Tamatama, amanisu kulri pusakai ka Twaumase; kiatubiaku muswane putaluvaivadha ku elathanesu.

² Amanisu kulri saibange ki sanaka umawmase; kiatubiaku muswane ngidrakala, si bilri ki paramuru ngikalrilrigu ka umawmase!

³ Tamatama, lri tara thaininwana ku vai ki tangangangace ka umawmase? Lri pakela lwigane kwi ngikalrilrigwane lini?

⁴ Kai ngikalrilrigu ki manganga ka umawmase lri pakela lwigane? Kai tangilralrigulrigwane ku tapasalrivane lini lri pakela lwigane?

⁵ Tamatama, kwi lalasu wadredredrepete ki kawkawlusu; kwi lalasu mabebebetethe ki umawmasesu.

⁶ Kwi lalasu papacai ki lawalibakane ka ababai si lapakulrulrulu, la papacai ki yababadhane ka kaika thingale lini ka umawmase.

⁷ Kwi lalasu amia kai: Ku Tamatama kai wadrele; ku Twaumase ki swa Iseraylri kai lri kakalithi la iya.

⁸ La sakacekele, anu mia kikai kangalradaangade ka kadrwa ku kidremedreme? Makulrungu ka umawmase, lwiganenga lai lri pulringalringau numi?

⁹ Ku Twaumase wakathi ki calringata, bekace kai maka kilalra? Ku Twaumase wakathi ki macata, bekace kai maka drele?

¹⁰ Ku Twaumase marasiakaikai ki sanaka kuni, bekace kai maka pathavungu liniane? Tarabulrubulru ki sanaka umawmase, bekace ka kadrwa ku thingalane?

¹¹ Ku Tamatama wathingale ku kidremedreme ki umawmase; wathingale ka kadrwa ku paluludane ku gathimi lini.

¹² Tamatama, ku bulrusu, mwaesailriinga ku kiabulru arakaisu ku hulrice ku umawmase!

¹³ Pakasulivatesu lu ikai ki akwalriane, pakeela ku atuvereverane mwadringi ki valrulrange si kamudu ku manganga ka umawmase.

¹⁴ Ku Tamatama kai lri cilri ki kawkawluini; lai kai lri cilri si kidaili ki umawmaseini.

¹⁵ Ku dringelresane lri tara ikaai tasaibaibangane mutaluvaivai; sanaka makalecege ka umawmase lri palakebe ki dringelresane.

¹⁶ Aneane kulri pasikai nakwane kikaruburu ki manganganga ka umawmase? Aneane kulri ikai nakwane kikai si papia ki pasalrisalriu ka umawmase kikaruburu?

¹⁷ Alaiyasi kai paralubu nakwane ku Tamatama, naika wapacainga naaku.

¹⁸ Amiaku kai: Mwadrekaku! Ai Tamatama, ku sakialibakesu waarake nakwane.

¹⁹ Lu kathekethekelraku kasalivalivalravaku, wasasasu, si pakiraragai nakwane.

²⁰ Kaisu mangwalatatatadre ki ngialisiane ka latabebelenge ikai kunkwane; kwi lalasu arakai ku hulrice subusubu ki kai madringelrese.

²¹ Kwi lalasu ngiaelre si kabebetethe ki mathariri ka umawmase, la vuutha pathavungu papacai ki kadrwa ku pasalrivane.

²² Ai ku Tamatama palakebe nakwane; ku Twaumaseli palakebe nakwane.

²³ Ku Twaumase lri pathavungu ki ngangacane lini, ngwalai ki pasalrivane lini si amudu liniane; Tamatama ka Twaumaseta lri amudu liniane.