Lasenai 92 - Ngudradreadrekadhane Ka Sisiu 魯凱語聖經

Wadrengedrengere ka senai

Senai ki Taisadrasadrane ka vai.

¹ Tamatama, matharirilringa ku patarwamara ku sakiaseasenane! Abebeelengenga ka Twaumase, ku wadrengedrengere muswane yai matharirilringa!

² Ikaiyaku ki mialrealre pelaelaela ku palralrawthu ka sakialibakesu, lukamaungu la pelaelaelaku ku takapatengatengananesu,

³ si arakai ku sapaungugakane pangitungutungutungu, pamamwamwa ki lingau ki harepe.

⁴ Tamatama, ku tapianesu pakiaragai nakwane; lri ngwaladhaku ku takaunganesu ku maadrau ka puku si senai kiraragai.

⁵ Tamatama, matiasamali turamuru ku tapianesu! Ku takidremedremanesu mwaadringi turamuru!

⁶ Ku makulrungu ka umawmase kai maka wathingale; ku makulrungu ka umawmase kai maka pwalringalringau:

⁷ Kai tangangangace ka umawmase alau lri ngimia ki ubulu ubulane cebecebe kakalra, ku manganganga ka umawmase alau lri dulru ngiradhekane padaudalru; ai kwi lalasu lri makitu kiamudu makanaelre;

⁸ Tamatama, kusu matiwsaesakenengasu ka abebeelengenga palralrawthu!

⁹ Tamatama, wathingale nai: Ku badhasu lri kamudu makanaelre; ku manganganga makanaelre ku umawmase lri katwase masivagavagai.

¹⁰ Pangiamiasu nakwane ki yaubulane ka lwange ngicaeme sapukwane; patarwamarasu baai nakwane ku kadrwa ku talikaiyane ku akaesadhane.

¹¹ Wadrelaku ku taamakiane ki labadhali; kialalrangaku ku tatubitubiane ki lamanganganga ka umawmase.

¹² Ku madringelrese ka umawmase lri mararaamau ki abare ku tangicaemanane; kwi lalasu lri ngimia ki cedare ka angatu Lebanungu ku mubelengane si adravane.

¹³ Kwi lalasu mia ki angatu ka kialredreke ikai ki daane ki Tamatama, ikai ki kalatadrane ki daane ki Twaumase ngiesaesadhane,

¹⁴ sa pasuludrunga pwamadrumaadrwana, ngiesadhane ku ricingi, ka takasaleseeane kai sulusuludru.

¹⁵ Kikai yai peaelaela ku aparamaramavane ki Tamatama, ku tarapalakelakebe nakwane takadringelresane.