Lasenai 91 - Ngudradreadrekadhane Ka Sisiu 魯凱語聖經

Tarapalakelakebe naiane ka Twaumase

¹ Sanaka papia ki Abebeelengenga kitubi ku akasulivatane, si itailebeane ki wadulru sanaka manemane ka Twaumase ki palakebe ku umawmase,

² lri dulru papia ki Tamatama iya kai: Amanisu ku takilakebaneli, ka nialradrane ka cekeleli. Amanisu ku Twaumaseli, satalwaku muswane.

³ Ku Twaumase lri palribulu muswane pakidaili ki amatikurwane patuelre, pakidaili ki sanaka apacadhane ka swalrubu.

⁴ Lri arakai ku sapakepake palakebe muswane; ikai ki tasiraparapalaneini lri tara kasulivatesu; ku takapatengatengananeini lri palakebe muswane.

⁵ Luka maungu, kaisu lri mukuludrunga ku matiakiwcu, lukavaiyane, lai kaisu mukuludrunga ku lri kikaruburu;

⁶ kaisu lri mukuludru ki swalrubu ika ki maungu, lai kaisu mukuludru ku sapapacai ki mwalringedele.

⁷ Adravane ikai ku takudrulu ku umawmase ku wapacai ikai tali virisu, la takudrai ku umawmase ku wapacai ikai tali vanalesu, ku amatikurwane kai lri mwa muswane.

⁸ Lri patakamacamacasu, drele ki manganga ka umawmase lu ucugu.

⁹ Asi lwiyane twatakilakebanesu ki Tamatama, tutaikaikaiyane ki Abebeelengenga,

¹⁰ ku sapapacai kai lri mwa muswane, ku amatikurwane lai kai lri ngwadadethe ki daanesu.

¹¹ Ku Twaumase lri sikawlu ki sasiakawlu belenge sirapale muswane, adravane papiasu kidruanga dadadavace itara palaakebe muswane.

¹² Kwi lalasu lri arakai ku alrima tapai muswane, kwi drapalesu lai kai kupungupungu ki lrenege si kadula.

¹³ Lri dredresu ki raiyungu si sulrau; lri dredresu pakaburau ki garagarange ka raiyungu si siduduku ka sulrau.

¹⁴ Ku Twaumase amia kai: Lri palribulaku ki madalame nakwane ka umawmase; lri palakebaku ki wasukubu nakwane ka umawmase.

¹⁵ Kwi lalasu lu kitubi nakwane, lri tubalreaku; kwi lalasu lu ikai ki akwalriane, lri tapalraku liniane. Lri palribulaku liniane, kwi lalasu lai lri malra ku lrigu.

¹⁶ Lri pakalragiaku ku niake si pakisupilri liniane; lri palribulaku liniane.