Lasenai 90 - Ngudradreadrekadhane Ka Sisiu 魯凱語聖經

Mwasaka supate ka hungu (Lasenai 90–106) Twaumase si umawmase

Inulri ki umawmase ki Twaumase ka Musi

¹ Tamatama, kikai lazidai amanisu ku takilakebane nai.

² Kai lalregelrege sakaiyana kibekace, kai kadaengane si kawmasane sakaiyana ngidarepe, twalai ku nadrumadrumadruma pakela palralrawlrawlrawthu, amanisu ku Twaumase.

³ Pasiaulriwlrisu ki umawmase mwa ki natasingikaiyaneini; pasiaulrisu liniane adae.

⁴ Lu drelesu ku tinara kudrulane ku caili mia ki nimakavavalane ka vai; mia ki amani kudra ngialribatenga kwiya, mia ki edreekane ka zikange ki maungu.

⁵ Miasu ki telebe aludru naiane; kai niake nai edreekane mia ki sipi. Mia nai ki warigarigi ka ubulu luka mialrealre,

⁶ luka mialrealre maadrau ngiesadhane, luka maungunga la kalraici si karudame.

⁷ Kiamudu nai ki lisianesu; ngwalai nai ki girimucanesu si ngituluku mukuludru.

⁸ Ngiapapicucubungusu kai pasalrivane nai, la putaluvaivaisu kai niseketane kai pasalrivane nai.

⁹ Kai caili nai ikai ki tailebeane ki lisianesu arwa kaedrekane; kai niake nai mia ki nikingivaalane daange la kawlrawnga.

¹⁰ Ku tapanianiakane nai ku caili si vai tara mapipiitulu, lu sapukwane kakecenge ku kinawmasane alau lri dulru kela ki taramavalrulu; ai ku malraini akwalriane kawpupungu sikakathane; kai niake sana ngibangulu maulrau, kuta makanaelre lri maru ngiapalai katwase.

¹¹ Aneane ku wathingale ku puku ki lisianesu? Aneane ku pwalringalringau ku matiukuludrane ku lisianesu?

¹² Kiatubi nai muswane bulrwa naiane ku tapiapiane asipi kikai edreekane ka caili si vai nai, la nai aru kalrigili.

¹³ Tamatama, lri palikai lwigane kwi lisianesu? Kiatubiaku muswane kakalitha ki sasiakawlusu.

¹⁴ Luka mialrealre ki vaivai, kiatubi nai muswane pakisupilra naiane ku kai lri akabalrithi ka sakialibakesu, ku tapanianianiakane nai lani suete ku sakiararagai!

¹⁵ Thaininunga ka caili ka vai ku tapakipadradresenganesu naiane ku akwalriane, kiatubi nai muswane ani ka thaa ku caili ku vai ku apakisupilranesu naiane ku akiragadhane.

¹⁶ Kiatubiaku muswane padrela ki sasiakawlusu ku maadrau ka puku ka tapianesu, si padrela ki agagane nai ku matisalrwane ka lrigusu.

¹⁷ Tamatama ka Twaumase nai, kiatubi nai muswane patarumara baai naiane ku akaesadhane! Kiatubi nai muswane pangimia ku piapia nai patueelre!