Lasenai 9 - Ngudradreadrekadhane Ka Sisiu 魯凱語聖經

Kiaseasene ku dringelresane ki Twaumase

Tusenai ki Davidi. La baai ki tarasangililuku ki sikatai. Ku lingau arakai ku “Mulapine”.

¹ Tamatama, lri savaeva kai kidremedremeli drengedrengere muswane; lri pelaelaku pasalraelre ku tamatisamaliane ku takaunganesu.

² Lri ngwaladhaku muswane si kiraragai senai; abebeelengenga, lri drengedrengeraku ki naganesu.

³ Sana utaluvaivaisu, mwabere ku badhali; kwini lalasu twabakebake makanaelre si pacai kamudu.

⁴ Wanenesu ikai ki sanianiangenga ka taetalane si arakai ku dringelresane saibange; pwasakaisu nakwane avavaga, si palakebe ku kindrili.

⁵ Maelaelasu ki sakamaelanane ka zuku, si amudu ki tangangangace ka umawmase; palralrawthungasu supilri ku nagane lini.

⁶ Ku badhali kai lri ikainga; waamudungasu ku lacekele lini; kwi lalasu kiakarimurunga.

⁷ Ai, ku Tamatama lrika palralrawthunga magagemegeme ku puku ki talialalai; pasiakai ki asaibangane si cegecege ku sanianiangenga ka taetalane.

⁸ Arakai ku dringelresane rathudu kawmasane; la arakai ku aparamaramavane saibange ki laumawmase.

⁹ Ku Tamatama yai amani ku takilakebane ki kiadredredrepete, ka takipalribulane lini lu supacengecenge kwalrialri.

¹⁰ Tamatama, ku wathingale muswane ku umawmase lri satalu muswane; kaisu wacilricilri ku wasilasilape muswane ku umawmase.

¹¹ Drengedrengera kudra yakai Ziyungu rathudu ka Tamatama! Papia sanaka kuni pelaelaela ku takaunganeini!

¹² Ku Twaumase makalithi ki kwalrialri ka umawmase; kai lri karimuru ku kitubi lini, lri pathavungu ki twalilisi liniane ka umawmase.

¹³ Tamatama, kiatubiaku muswane kakalithaili! Drela kudra ki malisilisi nakwane ku tapangimiane tulisi nakwane! Tamatama, palribulaili pakidaili ki apacadhane,

¹⁴ la nau dulru acegecege ikai cucubungu ki swa Yerusalrime, la pelaelaela ku tadrengedrengeraneli muswane patueelre. Lri ngwaladhaku ku tapalribulanesu nakwane si kiraragai.

¹⁵ Ku sakamaelanane ka zuku mwalrubangane ki lrubange lini, la kilrepelrepe ki pulravathe lini.

¹⁶ Ku Tamatama lri pangukai ki dringelresaneini lu saibange si ngipaputaluvaivai; ku tangangangace ka umawmase kiapatubakebake ki pasalriu lini.

¹⁷ Ku manganganga si wacilri ki Twaumase ka umawmase makanaelre lri muswadriadringi.

¹⁸ Ku matiakukuru ka umawmase kai lrika palralrawthu kikarimuru; ku sidramadrama ki kiadredredrepete kai lri kawlai kipangupukwane.

¹⁹ Tamatama, ngidrakala, madha patudreadrekase ki yakawmasane muswane! Kiatubiaku muswane dawla ki sakamaelanane ka zuku pucucubungu muswane, lani kisaibange.

²⁰ Tamatama, kiatubiaku muswane pamukuludra liniane; pangithathingala liniane ala ka lri tara pacai ka umawmase.