Lasenai 89 - Ngudradreadrekadhane Ka Sisiu 魯凱語聖經

Senai samatikurukuru ku kuni

Tusenai ki swa Izera ka Itane ka sabulrwane ka senai.

¹ Tamatama, lri palralrawthaku senai drengedrengere ku sakialibakesu; lri kainaku telratelrai ku apelaelaneli pasalraelre ku takapatengatengananesu.

² Wathingalaku, ku sakialibakesu lri ikai palralrawthu; ku takapatengatengananesu mia ki belenge palralrawthu kakecenge.

³ Amiasu kai: Namakaketeketenga naku ki pilrili ka umawmase; napwakawnunga naku ki sasiakawluli ka Davidi iya kai:

⁴ Lri paatalialaladhaku palralrawthu ki mwabaibalrithi muswane; lri pakakecengaku ki taetalane ki takatalialaladhanesu pakela ki mwabaibalrithi.

⁵ Tamatama, ku sasiakawlu belenge lri senai drengedrengere ku matisamali ku tapianesu; kwi lalasu ikai belenge lri drengedrengere ku takapatengatengananesu.

⁶ Tamatama, ikai subelebelenge kadrwa kulri dulru kiramau muswane; kadrwa ku drumane ku twaumase kulri dulru kitilibi muswane.

⁷ Ikaisu ki tayelrelreane ki latwaumase kiwsaesakenengasu; kiamusakenesu kiwkuludru ki ngiathalringulu ka latwaumase.

⁸ Tamatama ka abebeelengenga ki sanaka kwapingi, ku adravane ki pukusu aneane kulri dulru kiramau? Tamatama, ikaisu ki sanaka awngane patengatenganesu.

⁹ Warathungusu ki laveke; la paidrengeresu ki bikabiki.

¹⁰ Wababurausu ki Rahabe ka maelaelane ka waudriwdripi ikai laveke, si papacai iniane; arakaisu ku matisamaliane ku puku pamaki ki labadhasu.

¹¹ Kai subelebelenge muswane, kai kadaengane laka muswane; wabekacesu kai kawmasane si sanaka manemane.

¹² Twalai ki talikaiyane tali lrawdru pakela ki talikaiyane tali dradha bekacesu patuelre; lregelrege ka Tabure si Heremunge papia muswane patuelre kiraragai si senai akwadrau.

¹³ Kwi tabalanganesu ala sapukwane turamuru! Kwi pukusu ala maadrau turamuru!

¹⁴ Ku kunisu yai niarakaiyane ku dringelresane si aparamaramavane tukarwalai; patengatengane si sakialibake ku piasu patuelre.

¹⁵ Ku arakai ku senai sukubu muswane ku umawmase ala mwaesai! Kwi lalasu yakai ki ledra ki sakialibakesu panianianiake.

¹⁶ La ngwalai muswane, kwi lalasu twarakete kirararagai; kwi lalasu wadrengedrengere ki thariranesu.

¹⁷ Ku puku ki lrigusu pakagarange naiane; ku migemisu pasenai naiane akwadrau putariri.

¹⁸ Asi lwiyane amanisu ka Tamatama ka tarapalakelakebe naiane; kusu ka sanianiangenga ki swa Iseraylri amanisu ku talialalai nai.

Ku pukawnu ki Twaumase ki Davidi

¹⁹ Ku nasiaswalane, yakaisu ki maburusi iya kai ki patengatengane ka kawkawlusu: Wabaainga naku pasibengelrainga ki tangeea ka mwakalrivili ku takakwapingane; ku taetalane ki talialalai patarwamaranga naku baai kudra ki nipatwaladhane ki mapapangale pilri.

²⁰ Wapilriaku ki sasiakawluli ka Davidi; pwalawlavaku si cegecege iniane atalialalai numiane.

²¹ Lri patarumaraku baai iniane ku puku; kai pukuli lri pakagarange iniane.

²² Ku badhaini lri palralrawthu kai akaci iniane; ku manganga ka umawmase kai lri maka pamaki iniane.

²³ Lri pamakiaku ki kiaecebe iniane ku umawmase; lri papacadhaku amudu patuelre ku malisi iniane ku umawmase.

²⁴ Lri ara patengatenganaku si sakialibake marasikai iniane; lrika tapaakacianaku iniane.

²⁵ Lri paruswadravaku ku kadaengane ki kunini, twalai ka Miditerania ka laveke daruru kadravane Yuparati.

²⁶ Kwi lasu lri iya kai nakwane: Tamali muswane, ka Twaumaseli; amanisu ku tarapalakebe nakwane, ka tarapalribulu nakwane.

²⁷ Lri cegecegaku iniane atinutakane, ka sanianiangenga kai kawmasane ka talialalai.

²⁸ Lri pangimiaku kai kaela ku takilibakaneli iniane; lri ngimia palralrawthu ku takiketeketaneli iniane.

²⁹ Ku mwabaibalrithi iniane lri ikai ku lri gemegeme palralrawthu ku puku ki talialalai; ku taetalaneini lri mia ki belenge ikai palralrawthu.

³⁰ Ai, ku mwabaibalrithi iniane alaiyasi baebalre ki hulriceli, la kai paluludu ku padradrekaseli,

³¹ kwi lalasu alaiyasi cilri kidaili ki sabulrwaneli, si kai paluludu ku padradrekaseli,

³² lri ngwaladhaku ki pasalrivane lini si pathavungu liniane; lri ngwaladhaku ku tapasalrivane lini si lrumai liniane.

³³ Ai, lri pacungulaku arakai ku sakialibake marasikai ki Davidi; lri ka palralrawthaku ka patengatengane iniane.

³⁴ Kainaku lri mwalra cilri ku kiketeketeli iniane, lai kainaku ngikusawlri ku pukawnungali iniane.

³⁵ Lri papiaku ki saniange ka naganeli kiketekete: Lutumane kainaku lri tavuvulrucu ki Davidi!

³⁶ Ku mwabaibalrithi iniane kai lri kareteretege; lri sirapalaku ki kunini, mia ki vai palralrawthu paledra.

³⁷ Ku taetalaneini lri ikai palralrawthu mia ki dramare, amani kudra yakai belenge ka patengatengane akasikasi.

Wasasa ku taamakiane ki talialalai

³⁸ Ai malisisu ki pilrisu si cegecegesu ka talialalai; kaisu tarwamara iniane, wacilrisu iniane.

³⁹ Waulrawsu ku kiketeketesu ki sasiakawlusu, wacilrisu pucakena ku pagamucuini ka talialalai.

⁴⁰ Wasuburusu si kabebetethe ku alradre ki cekeleini, paakinaburukanesu ku nialradrane ka cekeleini.

⁴¹ Ku walribalribate masasawlri ku laumawmase makanaelre waribici ravase iniane; ku ngwadadethe ku lakuni twadreadreadrekase iniane.

⁴² Paakacisu ki badha iniane, pakiararagaisu turamuru ki labadhaini makanaelre.

⁴³ Pakakadruangasu ku paluludane ku adremeini, la amaki matisalregesege ikai ki tamakakaruburane.

⁴⁴ Waribicisu ku puku ka ukudruini, si kadrulu ku taetalaneini pucakena.

⁴⁵ Papasuludrusu iniane sakaiyana ka tarudrawdrange; la pakiarubwanesu iniane turamuru.

Kiatubi ki Twaumase ku apalribulane

⁴⁶ Tamatama, lri pakelasu lwigane kai kithathengete naiane? Lrika palralrawthu? Kwi lisianesu mia ki apwi kudaladalai, lri pakela lwigane?

⁴⁷ Kiatubiaku muswane ngulringava kai tapanianianiakaneli ka edreekane turamuru! Kiatubiaku muswane ngulringava ku bekacesu ka umawmase lri tara kaburau!

⁴⁸ Aneane kulri dulru panianianiake si kai pacapacai? Aneane kulri dulru mubere ku puku ki tadralredralrekane?

⁴⁹ Tamatama, ku sapelaelane ku nasakialialibakesu kunadruma yainu? Ku takapatengatengananesu ki Davidi yainu?

⁵⁰ Kiatubiaku muswane madha karimurimuru ku takitusinalremeane ki sasiakawlusu, kiatubiaku muswane madha karimurimuru ku takitungimiyaiyaneli kisidrekase ki maelane ka zuku.

⁵¹ Tamatama, ku labadhasu twadreadrekase ki cegecegesu ka talialalai; adravane mwinu kwi lasu, kwi lalasu twasinalrelreme iniane.

⁵² Ku Tamatama ani kidrengedrengere palralrawthu pakela lumamilringi! Amingi! Amingi!