Lasenai 88 - Ngudradreadrekadhane Ka Sisiu 魯凱語聖經

Lingau ki kiatubi ku akiparalubane

Senai ki zuku ki Kura, ka tusenai ki swa Izera ka Himane ka sabulrwane ka senai. La baai ki tarasangililuku ki sikatai, ku lingau arakai ku “Mahalaliame”.

¹ Tamatama ka palribulu nakwane ka Twaumaseli, waawngaku ku vai kitubitubi ku akiparalubane; watalearaku ikai cucubungu muswane kitubitubi.

² Kiatubiaku muswane kilalra kai inulrili, kilalra kai kitubitubili ku akiparalubane!

³ Makaalra kai akwalriane kai mwalebe makakai nakwane, la ikainga naku ki apacadhane.

⁴ Thadalranaku kudra ki yakainga ki apacadhane ka umawmase; akaelrenga naku ku pukuli.

⁵ Kiacilriaku pikai ki wapacainga ka umawmase, mia ki kiapapacai ka umawmase apece ikai tadralredralrekane; amaninga naku kudra kiakarimurunga muswane ka umawmase, ka kai lri kiparalubunga muswane.

⁶ Wacilrisu nakwane pwa ki valrulrange, ikai kwini ki mwaadringi turamuru si katakadradrimitane.

⁷ Ku lisianesu wadrepete pangicaeme nakwane; ku bikabikisu pakialringau sititi nakwane.

⁸ Pakatwasesu si cilri nakwane ku latalragilragili; pakavalracevacesu liniane nakwane. Kialringulaku, si kai maka katwase mubere;

⁹ kai macali ngwalai ki tatubiane si rimarimace. Tamatama, luka kaiya papiaku muswane kitubi; papiaku muswane ciliki kai alrima inulri.

¹⁰ Papiasu ki wapacainga ka umawmase pia ku matiasamali ku awngane? Ku abake lini lri dulru ngidrakale si drengedrengere muswane?

¹¹ Aneane kulri ikai tadralredralrekane pelaelaela ku sakialibakesu? Aneane kulri ikai swadriadringi pelaelaela pasalraelre ku takapatengatengananesu?

¹² Aneane kulri dulru ikai ki takadradrimitane drele ku tamatisamalianesu? Aneane kulri dulru ikai ki sulriane drele ku sulrapelanesu?

¹³ Tamatama, papiaku muswane kitubi ku akiparalubane; luka mialrealre papiaku muswane inulri.

¹⁴ Tamatama, asu cilri nakwane? Asu mubere kai pulringalringau nakwane?

¹⁵ Twaladhaku ki vavalake kwalri, kisanu pacapaacainga; kudra drimasu pathavungu kiadulrunga naku aru pasuludrunga.

¹⁶ Kwi lisianesu kagirimucu wadrepete pakaburau nakwane; kwi tasititanesu pangicaeme waamudu nakwane.

¹⁷ Ku akwalriane mia ki telebe ngithalringulu nakwane tareale; ku amatikurwane twalai kidruanga lringulu nakwane.

¹⁸ Pakatwasesu cilri kidaili nakwane kudra ki matatalrailragingali; kathaanenga ku dradrimitane ku papapalrali.