Lasenai 85 - Ngudradreadrekadhane Ka Sisiu 魯凱語聖經

Pasiakai ki kuni inulri ku akaesadhane

Senai ki zuku ki Kura. La baai ki tarasangililuku ki sikatai.

¹ Tamatama, sakwakakaalithisu ki kadaenganesu; pasiaulriwlrianesu ki swa Iseraylri peela tucekele.

² Pacepesu ku pasalrivane ki kawkawlusu; la pacepesu ku tapasalrivane lini patuelre.

³ Kaisu papianga liniane kalisi; ngwakusawlrisu ku girimucane.

⁴ Tarapalribulribulu naiane ka Twaumase, kiatubiaku muswane pangiradhekana naiane; kiatubiaku muswane idrengeranga kwi lisianesu naiane!

⁵ Bekacesu palralrawthu papia naiane kalisi? Kwi lisianesu lri palralrawthu kai idreengere?

⁶ Kiatubiaku muswane pelana pakagarange naiane; kunai ka kawkawlusu, lri drengedrengere nai muswane.

⁷ Tamatama, padrela naiane ku kai lri akabalrithi ka sakialibakesu; kiatubiaku muswane palribula naiane.

⁸ Kiacacaligiraku kilalra ku takawrivane ku vaga ki Tamatama ka Twaumase; alaiyasi kai nai ngukakainga ki makulrungu ka kadalranane, ku Twaumase lri patarumara ku sulivatane baai ki kawkawluini.

⁹ Lri tara palribulu ki mwasakene mukuludru iniane ku umawmase; ku lriguini lri salraelre ki kadaengane nai.

¹⁰ Ku sakialibake, patengatengane ka salrwane madradresenge; ku dringelresane, rathudane makakebere.

¹¹ Ku patengatengane ka salrwane ki umawmase twalai ki kadaengane mutaluvaivai; ku dringelresane ki Twaumase twalai belenge adrelane.

¹² Ku Tamatama ani ngiradhekane amia mitane; kai kadaengane nai lri tara tutaaleke.

¹³ Ku dringelresane lri aswalaala icucubungu ki Tamatama, pasikai iniane padulru ku kadalranane.