Lasenai 83 - Ngudradreadrekadhane Ka Sisiu 魯凱語聖經

Inulri pasikai ku apamakiane ki badha ki swa Iseraylri

Tusenai ki Asape.

¹ Twaumase, kiatubiaku muswane madha ka taicelrebane; Twaumase, kiatubiaku muswane madha metemete kwi ngudwi kai kawrivariva!

² Drela, kwi badhasu wabaebaebalrenga; ku malisilisi muswane ngiabalrebalrenga!

³ Kwi lalasu madrekadrekadrekase kiecebe ki kawkawlusu; kwi lalasu lri kabebetethe ki palakelakebesu ka umawmase.

⁴ Kwi lalasu amia kai: Abwala, alra amudu ki kuni lini, ku nagane ki swa Iseraylri ani kikariimurunga palralrawthu!

⁵ Kwi lalasu maramaramau ku kidremedreme madrekadrekase, si ngielre kiecebe muswane.

⁶ Kwi lalasu swa Idume, swa Isemaele; yakai ku swa Muabe, swa Hagare;

⁷ swa Gebale, swa Amune, swa Amaleke; swa Pelisitine, swa Tayre.

⁸ Ku swa Asiria mialri ngielre liniane, ngiaelre ki mwabaibalrithi ki Lute ka badha nai.

⁹ Kiatubiaku muswane kieceba liniane, mia ku takiecebane ki swa Midiange, mia sa ikaai thili vaalru ka Kisunge kiecebe ki swa Sisera si swa Yabingi.

¹⁰ Yakaisu Indure amudu liniane; ku wapacai ka kinawmasane lini yakai ubulane kaburau.

¹¹ Kiatubiaku muswane kieceba ki mabelenge ki kwapingi lini, mia sa kiecebe ki Urebe si Zebe; amuda ki warathudu liniane, mia sa amudu ki Zeba si Zalemuna;

¹² Asi lwiyane kwi lalasu amia kai: Bwala tamalra ribici, bwala tamalra kai kadaengane ki Twaumase, si ngitatumanemane.

¹³ Twaumaseli, kiatubiaku muswane pasawvagavagadha liniane, mia ki waipi ki thuvugu, lani ngimia ki lrapi kipalai ki valrigi.

¹⁴ Ku tangimiane lu lama ki angatungatu ku apwi, ku kelrabe lri ngimia lama ki abelenge ka lregelrege,

¹⁵ kiatubiaku muswane tuthadalrana arakai ku maadrau ku valrigi saladha liniane; kiatubiaku muswane tuthadalrana arakai ku udale kukuludru liniane.

¹⁶ Tamatama, kiatubiaku muswane kwi lalasu ani kiarubwane ngulringavane, lani pasudalepe ku maadrau ka pukusu.

¹⁷ Kwi lalasu ani palralrawthu amaki si mukuludru! Kwi lalasu ani ikai ki kiarubwanane pacai!

¹⁸ Kwi lalasu ani thingale ala ka kathanesu ku Tamatama! Amanisu ku Abebeelengenga ka magagemegeme kai kawmasane!