Lasenai 81 - Ngudradreadrekadhane Ka Sisiu 魯凱語聖經

Senai ki tatulrisisisiane

Tusenai ki Asape. La baai ki tarasangililuku ki sikatai, si arakai ku Gate ka patungutungu.

¹ Makakawkava kiraragai ki palakebe mitane ka Twaumase! Senadha drengedrengere ki Twaumase ki Yakubu!

² Senadha, la patungutungu; arakaiya ku lapatungutungu pangi patungutungu ku mathariri.

³ Luka aswalalanga ka vai si 15 ka vai, ngirapa kiraragai.

⁴ Kikai yai wabaai ki swa Iseraylri ka tinukakudhanane, ka drekase ki Twaumase ki Yakubu.

⁵ Kwi lasu sa katwase kikaruburu ki swa Izipiti, wabaai ki swa Iseraylri kikai padradrekase. Kialalraku ku lingau ki kaika thingathingaleli ku amia kai:

⁶ Mwalra ku kwi matelrege ka amece ki tabalanganesu; la pasararaku muswane kwi swaete ki karadrare kwi lringiga.

⁷ Sa kipadradresengesu ku akwalriane kiatubisu nakwane, la palribulaku muswane. Twaladhaku ki takipaidringane ki maadrau ka valrigi tubalre muswane; yakaiyaku babiabila ki tacebeane ki acilai ka Miriba kilrialringau muswane.

⁸ Kawkawluli, kilalra kai sapakipapawlringavaneli! Iseraylri, anatumane la kilalrasu pasalaladha nakwane!

⁹ Kaisu lri maka pasikai ki twaumase ki maelane ka zuku; kaisu lri maka sukubu ki drumane ka twaumase lu kainaku kamaani.

¹⁰ Tamatamaku ka Twaumasesu; patwaladhaku Izipiti ililuku muswane mulatadre. Manunganga kwi ngudwisu, lri pakabucukaku muswane.

¹¹ Ai kai kawkawluli kai kialalra ku vagali; kai swa Iseraylri kai pasalaladha nakwane.

¹² Lakamani singiakaainga naku liniane ku takakecengane, pacungulu ku kulrungane ki tapiapiane lini.

¹³ Siadramaku ku akilalrane ki kawkawluli! La sidramaku ku apasalaladhane lini nakwane!

¹⁴ Lri kirariimwaku pamaki ki labadha lini, si pamaki sanaka kiaecebe liniane ku umawmase.

¹⁵ Ku malisi nakwane ku umawmase lri kasalelebe ikai cucubungu nakwane; kwi lalasu lri kipathavungunga palralrawthu.

¹⁶ Ai lri baadhaku pakane numiane ku mathaithariringa ku mugi, lai lri kisupisupilri numi ku limemane ku singi ubulane ku valu!