Lasenai 80 - Ngudradreadrekadhane Ka Sisiu 魯凱語聖經

Pasiakai ku asiwlriwlriane ki kuni inulri

Tusenai ki Asape ka akasi. La baai ki tarasangililuku ki sikatai, ku lingau arakai ku “Bariangalai”.

¹ Taragwagu ki swa Iseraylri, ku tasangilukanesu ki mwabaibalrithi ki Yusepe mararaamau ki tasangilukanesu ki lakiu, kiatubiaku muswane kilalra naiane! Wanene ikai taetalane ki Kirubime ka Tamatama, kiatubiaku muswane ala paledra!

² Ikai cucubungu ki Iparaime, Biniyamingi, si Manase, kiatubiaku muswane putaluvaivadha ku maadrau ka pukusu; kiatubiaku muswane bwala palribula naiane!

³ Twaumase, kiatubiaku muswane pangiradhekana naiane; kiatubi nai muswane putaluvaivadha ku sakialibakesu, la nai dulru kipalribulu.

⁴ Tamatama ka Twaumase ka abebeelengenga ki sanaka kwapingi, ku kaika tapalrainganesu ku inulri ki kawkawlusu lri pakela lwigane?

⁵ Pamalrasu naiane ku lrese tuaga si pakane naiane, la pawngulusu naiane ku yakai ki madradrau ka kupu ku lrese.

⁶ Payakaisu ki kadaengane nai ki ngwadadethe ka lakuni makaruruburu; kai labadha nai ngiasasingikaai tumeamelrace naiane.

⁷ Twaumase ka abebeelengenga ki sanaka kwapingi, kiatubi nai muswane pangiradhekana naiane; kiatubi nai muswane putaluvaivadha ku sakialibakesu, la nai dulru kipalribulu.

⁸ Twalaisu Izipiti iluku ku vaeva ka cebe ki budu; pakatwasesu ki maelane ka zuku, si lredreke kikai angatu.

⁹ Pasiakaisu iniane kaungu kikai kadaengane, ku balaceini papwadriadringi, si dawdau salraelre ki kadaengane.

¹⁰ Ku alalinguini wakabungunga ki lalregelrege; ku laricingini wakabungunga ki tadradrau ka cedare ka angatu.

¹¹ Ku laricingi wadaruru kavai laveke Miditerania; ku balace ki angatu la daruru kavai babiabila kadravane Yuparati.

¹² Asu suburu mwalra ku saravadraneini, si pangilralraingi ki walribalribate ka umawmase malra kupa ku buduini?

¹³ Asi pakela ki lababwi dradredre kabebetethe iniane, ku twalai lregelrege ka lawaudriwdripi la kela kane iniane?

¹⁴ Twaumase ka abebeelengenga ki sanaka kwapingi, kiatubiaku muswane ngibangula kwi kidremedremesu, si twalai subelebelenge drele naiane, la palribulu ki kawkawlusu.

¹⁵ Kiatubiaku muswane bwala kadrenga ki lredrekesu ka budu, ka amani kudra pakadrawsu pakakecengesu ka saduduku!

¹⁶ Ku badha nai wacalrigi kai ki angatu, la lama iniane; kiatubiaku muswane papia liniane kalisi, si amudu liniane!

¹⁷ Kiatubiaku muswane palakeba ki cegecegesu ka kuni, la palakebe ki pilrisu ka kawkawlu.

¹⁸ Kai nai lri kidaili lrilrikudrunga muswane lutumane; lu papanianiakesu naiane, lri drengedrengere nai muswane.

¹⁹ Tamatama ka Twaumase ka abebeelengenga ki sanaka kwapingi, kiatubi nai muswane pangiradhekana naiane! Kiatubi nai muswane putaluvaivadha ku sakialibakesu, la nai dulru kipalribulu!