Lasenai 79 - Ngudradreadrekadhane Ka Sisiu 魯凱語聖經

Pasiakai ki kuni inulri

Tusenai ki Asape.

¹ Twaumase, ku maelane ka zuku wadrikisi ki kadaenganesu. Kwi lalasu la kudrulru ki daanesu, paatawlrakavane paubulane Yerusalrime.

² Kwi lalasu wamalra ku kinawmasane ka wapacainga ki sasiakawlusu si pakane ki kwau; la malra ku wapacainga ka kinawmasane ki kawkawlusu si cilri baai ki waudriwdripi.

³ Kwi lalasu paru vaalru pamwalwaludru ku erai ki kawkawlusu, walrenepenga Yerusalrime, kadrwa ku natangeeanga ku nisurane si dralreke ku kinawmasane ki wapacai.

⁴ Ku ngiathalringulu naiane ku lakuni twameameamelrace naiane; kwi lalasu mwalralrakai naiane, si pusirararanau naiane.

⁵ Tamatama, lri palralrawthusu papia naiane kalisi? Kwi lisianesu mia ki apwi ka kwadaladalai, lri pakelasu lwigane?

⁶ Kiatubiaku muswane kwi lisianesu papia ki kai mwasakene mukuludru muswane ka kuni, la gugwa pikai ki kinawmasane ki kai kiatubitubi muswane ka laumawmase.

⁷ Asi lwiyane kwi lalasu papacai ki kawkawlusu, pakasepele ki taikaikaiyanesu.

⁸ Kiatubiaku muswane madha ngwalalai ku pasalrivane ki cucungulane nai si pathavungu naiane. Kiatubiaku muswane kirimwa kakalithi naiane, asi lwiyane kadrwanga ku sasiadradrama nai.

⁹ Twaumase, kiatubiaku muswane paraluba naiane, palribula naiane; ngwaladha ki lrigusu, si palribulu naiane, pacepe kai pasalrivane nai.

¹⁰ Asi pakivaga ki lakuni iya kai: Yainu ku Twaumase numi? Kiatubiaku muswane padrela naiane lu pathavungusu ki lakuni, asi lwiyane kwi lalasu papacai ki lasasiakawlusu!

¹¹ Tukurwana kilalra ku tadangane ki lakiaemenge; arakaiya ku maadrau ku puku muelebe ki kiaemenge kalri kipapacai.

¹² Tamatama, ku pakiarubwane muswane ki ngwadadethe ka lakuni, kiatubiaku muswane drima ku taipitwane sawlri baai liniane.

¹³ Luka ngimiyaiya kikai, kunai ka kawkawlusu, si pagwagusu ka lakiu, lrika palralrawthunga nai kiaseasene muswane; lri drengedrengere muswane, pakeela ki mwabaibaibalrithi!