Lasenai 78 - Ngudradreadrekadhane Ka Sisiu 魯凱語聖經

Twaumase si kawkawluini

Tusenai ki Asape ka sabulrwane ka senai.

¹ Laumawmaseli, kilalra kai sabulrwaneli; kicacaligira kilalra kai vagali.

² Lri arakaiyaku ku pathalrilriku lalrwai pelaela; lri ara abulrwaku mupaipai ku kaika athingalane ka matiasamaimali ka tangilribatane:

³ Amani kudra kilalrangata thingalengata, ka pelaelaela mitane ki cucungulaneta.

⁴ Kaita lri papia ki lagaganeta sekete kilakikai, lri papiata ki mwabaibalrithi lalrwai pelaela: Ku tharirane, maadrau ka puku ki Tamatama, si matiasamali ku tapiane patuelre.

⁵ Wabaai ku hulrice ki mwabaibalrithi ki Yakubu; kwi lasu patarwamara ku padradrekase baai ki mapapangale ki swa Iseraylri. Wadrekase ki cucungulaneta, lri pawsuru ku hulriceini ki lagaganeta,

⁶ ku lrika akicawcakwanane ki mwabaibalrithi, ala pawcungulu ki lagagane lini.

⁷ Luka ngimiyaiya kai, kwi lalasu lri thingale satalu ki Twaumase, si kai karimuru ku tapianeini, la palralrawthu paluludu ku padradrekaseini.

⁸ Kwi lalasu ku kaika angimiane ki cucungulane lini, ka kiaececebe ka wabaebaebalre ku drekase ka umawmase, papia ki Twaumase ka kai mapapedrenge ku salrwane, papia iniane lani kamani kwidra piakai ku kai lri akabalrithi ku pasalaladhane.

⁹ Ku agagane ki Iparaime adravane ka arakai ku lraili kikaruburu, luka tamakakaruburane ka vai lri makitu katwase mawbebere.

¹⁰ Kwi lalasu kai paluludu ku tamakaketeketane lini ki Twaumase; kwi lalasu kai pasalaladha ku hulriceini.

¹¹ Kwi lalasu marimurunga ku tapianeini, marimurunga ku tapadrelaneini liniane ku pinangu Twaumasane ka puku.

¹² Ku Twaumase ikai ubulane Zuane, ikai Izipiti, pia cucubungu ki cucungulane lini pia ku pinangu Twaumasane ka puku.

¹³ Apauvagai ki laveke, la ililuku liniane lribate; pangiamia ki balingibingi cegecege.

¹⁴ Lukavaiyane arakai ku ememe ililuku liniane; lukamaungu la arakai ku apwi paledra liniane

¹⁵ Ku Twaumase yakai calragulragu paegacane ki alrisapesape, la ngulwadhane kwi lalasu ungulu ku twalai adringi ka acilai.

¹⁶ Ku Twaumase paberai ku acilai twalai ki alrisapesape, la mia ki kadravane ku acilai mwalwaludru.

¹⁷ Ai, kwi lalasu pacungucungulu pasalriu ki Twaumase, ikai calragulragu baebaebalre ki Abebeelengenga.

¹⁸ Kwi lalasu waraanau kituthiathingale ki Twaumase, pakai ku amalrane ku murikai lini ku akaneane.

¹⁹ Kwi lalasu la pasalriu makabelenge ki Twaumase, si iya kai: Ku Twaumase lri dulru pikai calragulragu pangiakaneane?

²⁰ Unu, ku Twaumase tengane ka watupuru ki alrisapesape, si la berai ku acilai mwalwaludru; ai lri mialri ka lri dulru baai mitane ku taleke, pasikai ki kawkawluini padulru ku akaneane ka beate?

²¹ Ku Tamatama ngwalai ku takilalraneini kikai vaga si kalisi. Arakai ku apwi kikaruburu ki kawkawluini ka Yakubu, kai maka ngiadradrepete ku elathaneini ki Iseraylri;

²² asi lwiyane kwi lalasu kai masalru iniane, la kai satalu ki tapalribulaneini.

²³ Ai, ku Twaumase papiana belenge drekase, mueleba iya ku lrawlrawdru subelebelenge;

²⁴ la patwalai belenge patarumara baai liniane ku taleke, la pulebe ku mana lapu liniane.

²⁵ Kwi lalasu la kane ku akaneane ki sasiakawlu belenge; ku Twaumase pakabucuku liniane.

²⁶ Ku Twaumase patwalai talrawane valrigi; la arakai ku sapukuane ku valrigi patwalai tali lrawdru.

²⁷ Pangialrau ki kiapalai ka enai pulebe ki laadhadhame, la baai liniane ku akaneane ka beate pangimia ki enai babiabila ki laveke ku kalrane;

²⁸ ku ngiapalapalai ka adhadhame mwalebe ikai ki tasulasuladhane lini, ikai ngithalringulu ki labalrawbau.

²⁹ Kwi lalasu la makitu kane makanaelre, si kabucukunga; ku Twaumase singiakai ku murikai lini baai liniane.

³⁰ Ai kwi lalasu apia kane kaikasapusapu, kwi ngudwi lini sataetaetalreana,

³¹ ku Twaumase papia liniane kalisi, si papacai ki layacengecenge lini, amudu ki ngiesaesadhanenga ki swa Iseraylri ka lalangukathathabarane.

³² Adravane ikai ku miyaiya kikai patuelre ka pinangu Twaumasane ka puku, kwi lalasu pacungucungulwana pasalriu; adravane ikai ku miyaiya kai patuelre ka matiasamaimali, kwi lalasu sakamiyana kai mubangalre kasalru.

³³ Ngwalai kikai ku Twaumase makakaai palikai ku vai lini, ku niake lini la pangitutuluku kimwa ki sapapacai.

³⁴ Ku Twaumase sa papacai liniane, kwi lalasu la ngibangulu papia iniane; kiangeange ku kidremedreme lini si ngitatupela, la pela kipasilape kitubi iniane.

³⁵ Kwi lalasu kiadremedreme ki Twaumase ala ka tarapalakebe liniane, ku Abebeelengenga ka Twaumase yai amani ku tarapalribulu liniane.

³⁶ Ai kwi lalasu swaete ki ngudwi ku tavuvulrucane; kwi vaga lini kaika patengatengane patuelre.

³⁷ Kwi lalasu papia iniane kaika patengatengane ku kidremedreme; kwi lalasu kai paluludu ku tamakaketeketane lini iniane.

³⁸ Ai, ku Twaumase makalithi ki kawkawluini; pacepe ki pasalrivane lini, si kai amudu liniane; la kingikaalrale ngidradrepete ku elathaneini, si kai kalisi.

³⁹ Ku Twaumase ngwalringau liniane ka twaramuru ka lri tara paacai ka umawmase, mia ki valrigi, sana valrigi kai siaulriwlringa.

⁴⁰ Kwi lalasu sa ikai calragulragu ubulane apatupelaela baebalre ki Twaumase; kwi lalasu kai watelrai pakasamadre ki kidremedremeini.

⁴¹ Kwi lalasu apapelaela kituthiathingale iniane, pakagirimucu ki sanianiangenga ka Twaumase ki swa Iseraylri.

⁴² Kwi lalasu marimurunga ku kadrwa ku talikaiyane ka maadrau ka pukuini, marimuru kudra vai ka tapalribulane liniane pakidaili ki badha,

⁴³ marimuru sa ikai Izipiti ku tapianeini ku pinangu Twaumasane ka puku, la kai ngulringau sa ikai Zuane dratane pia ku matiasamaimali.

⁴⁴ Ku Twaumase paerai ku acilai kadravane, la kai maka ungulunga ku swa Izipiti.

⁴⁵ Arakai ku thathatha ku alralrangau tulisi liniane, ku latakurawru la kabebetethe ki umawma lini.

⁴⁶ Ara lubalubai kane eleme ki taleke lini, la dawlu ki laapapawku kabebetethe ki angangade lini.

⁴⁷ Pwalebe ku kananu kabebetethe ki cebe ki budu lini, la pulebe ku pasabu si pakalisi ku cebe ki icizike lini.

⁴⁸ Ku Twaumase pwalebe ku kananu si papacai ki lalwange lini, ara lrikace papacai ki lakiu lini.

⁴⁹ Pakiapadradresenge liniane ku maadrau ku amatikurwane, ara elathane si girimucane tusasiakawlu ki apacadhane si lrumai liniane.

⁵⁰ Ku Twaumase kai ngiadradrepete ku elathaneini; kai pacepe ki niake lini, arakaai lringa ku swalrubu papacai liniane.

⁵¹ Papacai ki tinueapane ka lalake ki swa Izipiti sanaka daane, papacai ki yabalrawbavane ki Hame kudra ki ngiacaeme ku tacebeane ka aswalalanga kitulalake.

⁵² Sakabilrilinga, ku Twaumase mia ki taraagu sangililuku ki kawkawluini, ililuku liniane ngukakai calragulragu ubulane.

⁵³ Waililuku liniane kasuliivate, ka kadruanga ku thathiburane ku thekelrane; ku badha lini la kilrenepe ki laveke.

⁵⁴ Waililuku liniane kainganai mwa ki saniange ka kadaengane, wamwa kudra ki malraini ka lregelrege.

⁵⁵ Ku Twaumase yakai cucubungu ki kawkawluini pakatwase ki maelane ka lazuku, la malra kwini kadaengane si apavalavala baai ki lazuku ki swa Iseraylri, kwini ladaane ki maelane ka zuku la baai ki kawkawluini.

⁵⁶ Ai, kwi lalasu kiatuthiathingale si baebalrenga ki Abebeelengenga ka Twaumase; kwi lalasu kai pasalaladha ku padradrekaseini.

⁵⁷ Kwi lalasu mia ki cucungulane lini baebalre si kaika patengane ku kidremedreme; kwi lalasu mia ki nilrukanenga ka bu ka kaika asudralrwalrwane.

⁵⁸ Kwi lalasu twa tapatarumaramarane ki maelane ka takisuswane pakagirimucu iniane si kalisi; kwi lalasu arakai ku nipacekane ka samiamiange si pakagirimucu iniane.

⁵⁹ Ku Twaumase sadrele maliisi, si pakisaalru cilri ki swa Iseraylri.

⁶⁰ Kwi lasu wacilringa kudra yakai kavai Selu ku balrawbau, amani kudra taikaikaiyane sa taelreana mitane.

⁶¹ Palraingi ki labadha malra iluku ku Langiane ki Twaumase, kudra sapatuthingalane ku pukuini si lriguini.

⁶² Ku Twaumase malisi ki kawkawluini, la papacai liniane ikai ki lrabu ki badha.

⁶³ Ku layacengecenge lini kiamudu ikai ki tamakakaruburane; ku latawvailekelekete lini kai maka kiadringainga ku amwane karudrange.

⁶⁴ Ku labarakalai lini kiapapacai ara lrabu, ku lawalibakane lini la kai maka pasikai tubi.

⁶⁵ Ku Tamatama ala mia ki twalai ki tapecane pacunu si ngidrakale; mia ki garagarange ka sawvalai lu ngubusukanenga kagalremegeme.

⁶⁶ Pasiaulringa ki badha, kwi lalasu la amaakinga si kiarubwane.

⁶⁷ Ai ku Twaumase wacilri ki mwabaibalrithi ki Yusepe; la kai pilri ki ngwakai ki Iparaime ka zuku.

⁶⁸ Wapilri ki ngwakai ki Yuda ka zuku, si pilri ki kadalameini ka lregelrege Ziyungu.

⁶⁹ Ikai kwini, twadaane ku daane ki Twaumase, ku abelengane kialekete subelebelenge, mia ki kadaengane acegecege, kakecenge palralrawthu.

⁷⁰ Ku Twaumase wapilri ki sasiakawluini ka Davidi, patwalai ki takawaunganeini agu ki kiu dawlu iniane,

⁷¹ kwi lasu la kai siraparapalenga ki lakiu, wacegecege iniane atalialalai ki swa Iseraylri, si kamaninga ku taragwagu ki kawkawlu ki Twaumase.

⁷² Kwi Davidi savaeva ku kidremedreme agwagu lapu liniane, ara lrigilane si thingalane sangililuku liniane.