Lasenai 76 - Ngudradreadrekadhane Ka Sisiu 魯凱語聖經

Akaci ka Tamatama ka Twaumase

Tusenai ki Asape. La baai ki tarasangililuku ki sikatai, si arakai ku patungutungu paungugake.

¹ Ku Twaumase ikai Yuda, wathiingale sanaka umawmase; ku naganeini ikai Iseraylri, mwasakene sanaka umawmase.

² Yakai ku taikaiyaneini ikai Yerusalrime; ikai lregelrege Ziyungu yakai ku taikaikaiyaneini.

³ Ikai kwini, wacelra ku bu si lraili ki badha, la kabebetethe ku alathare lini, dramu, si makaelaela ka adreme.

⁴ Twaumase, ala salriguanesu! Sapamakisu ki badha, si twalai ki lalregelrege kainganai, matiasalru turamuru!

⁵ Ku laravase ki lagaragarange lini kiaribici patuelre; ku lakwapingi lini wapece kai ngidrakalenga, kadrwa ku puku kiecebe.

⁶ Twaumase ki Yakubu, sana kaelaelasu liniane, kwi sakikaruburuburane ka rigi si ngwarigirigi wapacai makanaelre.

⁷ Twaumase, matiamusakenesu matimukuludru; lu kalisisu, aneane kulri maka acegecege ikai cucubungu muswane?

^8-9 Twalaisu kavai belenge pelaela ku sasaibanganesu; sana acegecegesu si pelaela ku tasaibanganesu, lri palribulu ki kiadredredrepete ka umawmase, kai kawmasane mwakuludru, si icelrebe kai avavagavaga.

¹⁰ Ku elathanesu ki umawmase lrika arukidrengedrengeranesu kamani; ku abalu ku laumawmase lri pangimia ku la tatulrisisisianesu.

¹¹ Papia ki Tamatama ka Twaumase numi sawlri baai ku kiketeketenga numi; ku ngwadadethe ka lakuni lri papia iniane makanaelre tupadulru, si musakene mukuludru iniane.

¹² Lri telenge ku ngikalrilrigwane ki lalalake ki talialalai; lri pamanugiligili ki latalialalai kai kawmasane.