Lasenai 75 - Ngudradreadrekadhane Ka Sisiu 魯凱語聖經

Tarasaibaibange ka Twaumase

Tusenai ki Asape. La baai ki tarasangililuku ki sikatai, ku lingau arakai ku “Madha kalisilisi”.

¹ Twaumase, kiaseasene nai muswane, kiaseasene nai muswane! Peaelaelaela nai pasalraelre ku sanianganesu, la pelaelaela nai ku matisamaliane ku tapianesu.

² Ku Twaumase amia kai: Wakelretenga naku ku asaibangane ku vai; lri arakaiyaku ku aparamaramavane saibange.

³ Adravane lridrawdrawdrau kai kadaengane si yakaikai ki kadaengane ka laumawmase, lri pakakecengaku ku karwalaini.

⁴ Lri kainaku pangipaparamuru ki ngiakalrilrigu ka umawmase; madha dradrarane lri iyaku ki manganga ka umawmase;

⁵ lri kainaku pangipaparamuru liniane, si kai ngipaparamurunga ngitatwadrau.

⁶ Ku asaibangane kai lri twalai tali talrawane kai lri twalai tali sapakalriwgu, lai kai lri twalai tali dradha tali lrawdru;

⁷ ku asaibangane yai lri twalai ki Twaumase, yakai ku la lri kitupasalrivane ku umawmase, yakai ku la lri kai kitupasalrivane ku umawmase.

⁸ Ku Tamatama waecenge ku kupu, swaete ki kupu ku sapukwane ka bava ka lisianeini. La gugu kwini bava; ku manganganga ka umawmase wakela makanaelre ungulu, pakeela ki waeleme ungulu.

⁹ Ai, lri palralrawthaku pasalraelre pelaelaela ki Twaumase ki Yakubu; lri kainaku telrai senai drengedrengere iniane.

¹⁰ Ku Twaumase lri baburau ku puku ki manganga; lai lri drima ku puku ki madringelrese ka umawmase.