Lasenai 74 - Ngudradreadrekadhane Ka Sisiu 魯凱語聖經

Pasiakai ku takwalrialriane ki kuni inulri

Tusenai ki Asape ka sabulrwane ka senai.

¹ Twaumase, asu kawlainga cilri naiane? Lri palralrawthusu papia ki lakiusu kalisi?

² Kiatubiaku muswane ngulringava kunadruma sapilrisu ki kawkawlusu, ku langaisu sawlri, ka muswane ka zuku; kiatubiaku muswane ngulringava ku nataikaiyanesu ka Ziyungu.

³ Ku badha nai mabebetethenga ki daanesu; kiatubi nai ku akelanesu, si drele kai lakavara ka kinaburukanenga.

⁴ Ku labadhasu yakai ki daanesu makakawkawkau kirararagai; kwi lalasu wacegecegenga ku kalralradha lini.

⁵ Kwi lalasu mia ki kiangatungatu ka umawmase, arakai ku kumugu pulebe ki laangatu.

⁶ Ikai ki daane ki Twaumase ku nipapacasane patuelre ku laulrudru, kwi lalasu ara kumugu si pangulru kabebetethe.

⁷ Kwi lalasu walama ki daanesu; kwi lalasu twadreadrekase ki tasukusukubane muswane.

⁸ Kwi lalasu malrithethe ku apakitulrepengane amudu naiane; kwi lalasu ikai kai ki kadaengane sanaka Alrivilrivi ka taikaikaiyane walama patuelre.

⁹ Kudra lasaniange ka sapatuthingalane maulrawnga patuelre; kadrwanga ku yuginsia; kadrwa ku umawmase ku wathingale kikai matikurwane lu lri pacungulu tarathainu.

¹⁰ Twaumase, kai labadha nai lri pakela lwigane ulralrakai muswane? Bekace palralrawthu tudreadrekase ki naganesu?

¹¹ Asu kai paralubu naiane? Asu ithili la palraingi siavavava?

¹² Ai Twaumase, twalai kunadruma amanisu ku talialalai nai; kingikaalralesu palribulu naiane.

¹³ Arakaisu ku maadrau ku puku pawvagai ki laveke; walutusu ku awlru ki maelaelane ka waudriwdripi ikai laveke.

¹⁴ Wacwakesu ku awlru ki maadrau ka waudriwdripi ikai ki laveke, la apavalavalasu ku labeate lini baai pakane ki yaubulane ka waudriwdripi.

¹⁵ Paberaisu ku acilai ki tacebeane; pakadrekaresu ki kadravane.

¹⁶ Wakelretesu ki vaiyane si maungu; la pasudalepesu ku taikaiyane ki vai si dramare.

¹⁷ Wacegecegesu ku pagisane ki kadaengane; la kelretesu ki kaladralrangedrangane si kalakecelrane.

¹⁸ Tamatama, kiatubiaku muswane ngulringava ku tamulralralrakadhane muswane ki labadhasu; kiatubiaku muswane ngulringava ku tatudrekasane muswane ki kai kiasusu ka umawmase.

¹⁹ Madha malramalra ki twaramuru ka kadrwa ku paralubu ka kawkawlusu si baai ki ngiakarakacane ka labadha; madha karimurimuru ki kiadredredrepete ka kawkawlusu.

²⁰ Kiatubiaku muswane ngulringava ku takiketeketanesu naiane, asi lwiyane kai kawmasane ku takadradrimitane sanaka inunga yakai suete ku ngiakarararakacane.

²¹ Kiatubiaku muswane madha pakitusinalrelreme ki kiadredredrepete ka umawmase; kiatubiaku muswane ani drengedrengere muswane kudra twaramuru ka kadrwa ku paralubu ka matiakukuru ka umawmase.

²² Twaumase, kiatubiaku muswane ngidrakala si palakebe ki dringelresanesu; kiatubiaku muswane pulringava ki kai kiasusu ka umawmase waawngu ku vai ulralralrakai muswane.

²³ Madha karimurimuru ku taalealealane ki labadhasu; madha karimurimuru ki badhasu ku tariariangane kai isadrasadra.