Lasenai 73 - Ngudradreadrekadhane Ka Sisiu 魯凱語聖經

Mwasaka tulru ka hungu (Lasenai 73–89) Dringelresane ki Twaumase

Tusenai ki Asape.

¹ Ku Twaumase patengatengane ka kialibake ki swa Iseraylri, la kilibake marasikai ki mabula ku kidremedreme ka umawmase.

² Ai kiasanu ngwadrekaku, kiasanu thulridraku;

³ asi lwiyane pathalraku lu ngiesaesadhane ku ngiakalrilrigu ka umawmase, lu drelaku ki manganga lu kaesaesai kai mathariri kai kidremedremeli.

⁴ Kwi lalasu kai kiapadradresenge ku akwalriane; kwi lalasu ngiacaeme ku tacebeane si kathariri ku kinawmasane.

⁵ Kwi lalasu kai ngimia ki palrapalra kwalri; kwi lalasu kai ngiamia ki palrapalra kipadradresenge ku akwalriane.

⁶ Lakamani, kwi lalasu siasilu ku ngikalrilrigwanane; kwi lalasu siaebele ku ngikarakacanane.

⁷ Ku kidremedreme lini ngiaburai ku ngilisianane; ku takidremedremane lini swaete ku tavuvulrucane.

⁸ Kwi lalasu mwalralrakai ki palrapalra, la iya ku ngialisiane ka vaga; kwi lalasu ngiatatwabelenge ngitatwadrau, si kikake ku adredrepetane ki palrapalra.

⁹ Kwi lalasu twadreadrekase ki yabelenge ka Twaumase, si ililuku ki thadalraneini ka laumawmase,

¹⁰ adravane ka kawkawlu ki Twaumase ngiabaangulu papia liniane, si kasalru ku taiyane lini patuelre.

¹¹ Kwi lalasu amia kai: Ku Twaumase kai lri thingale; ku Abebeelengenga kai lri drele.

¹² Ku manganga ka umawmase ngimiyaiya kikai; kwi lalasu maesaesaesainga, laka sakamiya ku ravane lini kai kasapusapu.

¹³ Lumia kwini, kiapapawlringavaku si ngilalakebe, kainaku walreme pasalriu, kikai yai avutha?

¹⁴ Twaumase, waawngusu ku vai pakwalri nakwane; lukamialrealre, tara pathavungusu nakwane.

¹⁵ Alaiyasi iyaku kikai miyaiya kai ka vaga, amaningaku kudra kaika twakapatengatengane papia ki kawkawlusu.

¹⁶ Paiyanga naaku nau thingale iya kikai, ai kainaku maka wadulru;

¹⁷ samudaanenga naku ki daanesu, ala thingalaku ku lrika angimiane ki manganga ka umawmase.

¹⁸ Lri malrasu liniane pwa ki mathathulridri; lri patubakebakesu liniane si pakamudu.

¹⁹ Kwi lalasu lri yasasane si kiamudu; kwi lalasu yakainga ki matiaukuludru ku lrika angimiane.

²⁰ Kwi lalasu mia ki sipi, luka mialrealre maulrau; Tamatama, sana pacunusu, kwi lalasu lri kawlrau.

²¹ Nakai mathaithaithariri kai kidremedremeli, la kipakadula kai takidremedremaneli,

²² ngiamiaku ki waudriwdripi kakulrungu; kainaku maka wathingale muswane.

²³ Ai, yakaiyanaku taelre muswane; kaisu watelrai ara alrima arake nakwane.

²⁴ Pakiapapawlringawsu bulru nakwane, ki bibilrilinga la pasudaalrwananasu nakwane, ala ikai ku lriguli.

²⁵ Kathanesu, ikai belenge aneanana ku yakai? Kudra yakaingasu, ikai kai kawmasane aneanana ku amurikaiyaneli?

²⁶ Kai kinawmasane si kidremedremeli lri aru sulusuludru; ai ku Twaumase yai pukuli, palralrawthu ka amani ku urikaikaili patuelre.

²⁷ Kudra lawacilri muswane ku umawmase lri tara pacai; sanaka kai twakapatengatengane muswane ka umawmase, lri amudusu.

²⁸ Kwaku, lu dulrwaku kidethe ki Twaumase matharirilringa! Lrika takilakelakebaneli ki abebeelengenga ka Tamatama; lri pelaelaelaku ku tapianeini patuelre.