Lasenai 71 - Ngudradreadrekadhane Ka Sisiu 魯凱語聖經

Inulri ki tangea ka tarudrawdrange

¹ Tamatama, kiatubiaku muswane ku akipalakebane; kiatubiaku muswane madha pamakimaki nakwane.

² Madringelresesu; kiatubiaku muswane paralubaili, palribulaili! Kiatubiaku muswane kilalra kai kitubili, palribulaili!

³ Kiatubiaku muswane kamania kudra mapapedrenge ka takilakebaneli, ka amani ku palakebe nakwane ka makecenge ka kepale; asi lwiyane amanisu ku takilakelakebaneli, ka kepaleli.

⁴ Twaumaseli, palribulaili pakidaili ki manganganga ka umawmase; la nau kidaili ki puku ki ngiakarakacane ka tanganganga.

⁵ Abebeelengenga ka Tamatama, amanisu ku sidramadramali; singika vavaalakaku sudralru muswane.

⁶ Ku tapanianianiakaneli satalwaku muswane; sakitulalakaku palakebesu nakwane. Lrika tadrengedrengeeranaku muswane.

⁷ Takaalra ku laumawmase ku masamali kai takawmawmasaneli, takamanianesu ku makecenge ka takilakelakebaneli.

⁸ Waawngaku ku vai drengedrengedrengere muswane; la pelaelaelaku ku lrigusu.

⁹ Pasuludrunga naku kikai, kiatubiaku muswane madha cilricilri nakwane; twaramurunga naku, kiatubiaku muswane madha sarasarare nakwane.

¹⁰ Ku badhali lri papacai nakwane; kwi lalasu arakai kidruanga kikake si kiecebe nakwane.

¹¹ Amia kai kwi lalasu: Ku Twaumase wacilringa iniane, abwala takurisi si pwalra iniane, kadrwa ku umawmase kulri palribulu iniane.

¹² Twaumase, kiatubiaku muswane madha kidaidaili nakwane; Twaumaseli, kiatubiaku muswane bwala kirimwa paralubu nakwane!

¹³ Ku kiakaruburu nakwane ku umawmase ani sipai si kamudu; ku kiasanu kabebebetethe nakwane ku umawmase ani kiarubwane si kipulrialrivale.

¹⁴ Ku sidramadramali lrika tapikaiyaneli sudralru muswane; lri aru drengedrengeraku muswane.

¹⁵ Lri pelaelaelaku ku dringelresanesu; adravane kai pakela ku tathingalaneli, lukavaiyane lukamaungu lri pelaelaelaku ku tapalribulanesu.

¹⁶ Abebeelengenga ka Tamatama, lri drengedrengeraku ku adravane ku pukusu; lri tuvaevaku pelaelaela ku dringelresanesu.

¹⁷ Twaladhaku sakavavalake kibulru muswane; pakelanga kaikameane thadaalraneanaku pelaelaela ku matisamaliane ku tapianesu.

¹⁸ Kaiasasane pasuludrunga naku ka maudrasenga kai isiwli, Twaumase, kiatubiaku muswane madha cilricilri nakwane! Lu papiaku ki mwabaibalrithi pelaelaela ku kindrisu si adravane ku pukusu, kiatubiaku muswane tapalraili.

¹⁹ Twaumase, ku dringelresanesu wadaruru kavai talikaiyane ki ememe. Pangiamiasu ku maadrau ka awngane; kadrwa ku umawmase kulri maka kiramau muswane.

²⁰ Pakiapadradresengesu nakwane ku makaalra ku matikurwane si akwalriane; ai lri pasiwlriwlrianesu ku pukuli; kaisu pamwadringi nakwane ki balriu.

²¹ Lri paruka madradrausu nakwane ki siaswalane; lri pelasu kela sasa nakwane.

²² Twaumaseli, lri patungutungaku drengedrengere ku takapatengatengananesu; sanianiangenga ki swa Iseraylri, lri patungutungaku drengedrengere muswane.

²³ Lu drengedrengeraku muswane lri kiraragadhaku akwadrau senai; lri akwadravaku senai, asi lwiyane palribulusu nakwane.

²⁴ Lri awngaku ku vai pelaelaela ku dringelresanesu, asi lwiyane ku kiasanu tulisilisi nakwane ku umawmase wasipainga si kiarubwane.