Lasenai 7 - Ngudradreadrekadhane Ka Sisiu 魯凱語聖經

Kiatutubi ku dringelresane

Ku Davidi ngwalai ku takikaruburane iniane ki swa Biniyamingi ka Kuse, la papia ki Tamatama senai ka senai

¹ Tamatama ka Twaumaseli, amanisu ku takilakebaneli; palribulaili pakidaili ki wasaladhaladha nakwane ka laumawmase.

² Amani lu mia ki raiyungu kwi lalasu pwalra nakwane, si baburau nakwane, laka kadrwa ku umawmase ku wadulru palribulu nakwane.

³ Tamatama ka Twaumaseli, lu ikai ku kaika tauleceganeli, la ikai ki alrimali ku pasalrivane,

⁴ si arakai ku ngialisiane bilri ki talragi, pangilralraingi ki kadrwa ku ukai ku pacugane si kitubadha nakwane,

⁵ ani singikaainga ku badha saladha nakwane, si pwalra nakwane; lani thiabe nakwane, si papacai nakwane, la nau tubakebake pacai ikai daedae!

⁶ Tamatama, kagalremegema ngidrakale, la ikai ki elathane lrumai ki badhali. Ngidrakala si paralubu nakwane, asi lwiyane ku dringelresane yai murikaisu.

⁷ Ku sanaka umawmase ani ngithalringulu muswane; asu gemegeme ku puku si rathudu liniane.

⁸ Tamatama, saibanga ki sanaka umawmase; la pelaela ka kadrwa ku pasalrivaneli, asi lwiyane kiavuthaku.

⁹ Amanisu ku madringelrese ka Twaumase; maka wadrelesu ku kidremedreme ki umawmase. Telenga ku akangangane ki tangangangace ka umawmase, la pakalreva ku tapiane ku mathariri ki makalecege ka umawmase.

¹⁰ Ku Twaumase palakebe nakwane ka alathare; palribulu ki piakai ku dringelresane ku kidremedreme ka umawmase.

¹¹ Ku Twaumase madringelrese ka tarasaibaibange; lukavaiyane lukamaungu pathavungu ki manganga ka umawmase.

¹² Kai umawmase lu kai ngitatupela, ku Twaumase lri twadreme pakarangisi ku dramuini; si pulraili bilakace ku buini,

¹³ la padulrunga ku lri muniake ka adreme, si pwalraili kudra kwadaladalai ka lraili.

¹⁴ Kudra latangangangace ka umawmase madrekadrekase ku ngialisiane ka awngane; pacebe ku lrithavulane, si twalrawnga apalrigilrigilrigili.

¹⁵ Kai lalasu walruku tulrubange, lri pawlrubangane ki palrapalra, ai amaanilringaini ka mwalrubangane!

¹⁶ Kwi lalasu lri ngwalai ki ngangacane lini si kipathavungu, lai lri ngwalai ki ngikarakacanane lini si sulisi.

¹⁷ Lri kiaseasenaku ku dringelresane ki Tamatama; lai lri senadhaku drengedrengere ku nagane ki Abebeelengenga.