Lasenai 69 - Ngudradreadrekadhane Ka Sisiu 魯凱語聖經

Kiatubi ku akiparalubane

Tusenai ki Davidi. La baai ki tarasangililuku ki sikatai, ku lingau arakai ku “Bariangalai”.

¹ Twaumase, kiatubiaku muswane palribulaili! Kai acilai wakelanga ki lreli.

² Mwatheneaku ki beneke, kadrwa ku tadredreaneli; mwatheneaku ikai ki madrau ka acilai, ku bikabiki walrenepenga nakwane.

³ Ngwalai ku takawkavaneli ku akipalribulane si kabalreebalrenga, kameale kai lrulrungu; ngwaladhaku ku tamukalavane ku akiparalubane muswane warimarimacenga kai macali.

⁴ Ku wavutha kalisi nakwane ku umawmase makakalra ki isiwli; ku wavutha kiecebe nakwane, kisanu amwamudu nakwane ku umawmase tagagarange turamuru. Kwi lalasu baadha amia nakwane ku kaika ribicili ku lamanemane.

⁵ Twaumase, wathingalesu ka makulrungaku turamuru; kainaku wasesekete muswane kai pasalrivaneli.

⁶ Abebeelengenga ka Tamatama ka abebeelengenga ki sanaka kwapingi, ku satalu muswane ku umawmase ani kai ngwalai nakwane si kiarubwane. Twaumase ki swa Iseraylri, ku wasukubu muswane ani kai ngwalai nakwane si kitusinalreme.

⁷ Amaniaku ku ngwalai muswane si kikaelaela tusinalrelreme, la kadirelenga ku lringau.

⁸ Ku laretesaneli kiadailinga nakwane; ku wacekecekeleli twa amaninga kudra kaika thingale lini ka umawmase nakwane.

⁹ Maculu kai kidremedremeli lu papia ki saniange ka daanesu, mia ki apwi ka kwadaladalai; ku papia muswane ki palrapalra tusinalrelreme makakaai nakwane patuelre.

¹⁰ Walaisaku ngiraruthuku, kwi lalasu la baalrelringa tusinalrelreme nakwane;

¹¹ lu sisakalremeanaku, kwi lalasu mwalralrakai nakwane makanaelre.

¹² Kwi lalasu yakai ki lakadalranane ki cekele mapelaelaela nakwane, adravane ka lamabubusuku twasenai tumeamelrace nakwane.

¹³ Tamatama, ala kunaku, lri papiaku muswane kitubi; Twaumase, ngwalai ku palralrawthane ka sakialibakesu, ngwalai ku pukawnungasu ku apalribulane, kiatubiaku muswane singikaiya ku takelretanesu ku vai si tubalre nakwane.

¹⁴ Kiatubiaku muswane palribulaili katwase ki beneke, si kai uthene; kiatubiaku muswane pakidailaili ki labadha si madrau ka acilai.

¹⁵ Kiatubiaku muswane madha pakilrenelrenepe nakwane ki telebe, madha pakilrelrelre nakwane ki valrulrange, la madha pakidralredralreke nakwane pikai ki balriu.

¹⁶ Tamatama, kiatubiaku muswane singikaiya ku tharirane ki sakialibakesu si pukawnu nakwane; kiatubiaku muswane singikaiya ku kilibakanesu sirapale nakwane.

¹⁷ Kiatubiaku muswane madha ubebere si kai marasikai ki sasiakawlusu; yakaiyaku ki sakwalrialri, kiatubiaku muswane makakaiya palraingi nakwane.

¹⁸ Kiatubiaku muswane bwala palribulaili; kiatubiaku muswane patwaladha ki alrima ki badha langai nakwane.

¹⁹ Wathingalesu ku takipianeli kikalrelreme, kisidreadrekase; wathingalesu ki badhali makanaelre.

²⁰ Ku tusinalremeane pakaburau ki kidremedremeli, la kasulriaku. Mwarikaiyaku ku akikakalithane, ai kadrwa; siadramaku ku sasasane, mialri ka kadrwa.

²¹ Lu kasilrawnga naku, kwi lalasu wabaai nakwane ku duku ka sasulravane; lu kakadhamenga naku, kwi lalasu wabaai nakwane ku malriu kapalili ka acilai.

²² Kwi tangiakanekaneanane lini ani kamani ku takamudane lini; ku takirararagadhane lini ani kamani ku tamatikurwanenga lini.

²³ Ku maca lini ani kamukici, si kai dulru drele; ku tasilakelaketane lini ani kiangeange kabalrebalre.

²⁴ Kiatubiaku muswane papia liniane gugu kwi elathanesu; kwi dringelresane ka elathanesu ani padali liniane

²⁵ Ku taikaikaiyane lini sulai ani aubulane; ku balrawbau lini ani kakadrwa ku umawmase ku yakaikai.

²⁶ Kwi lalasu twalilisi ki lrumaisu ka umawmase; kwi lalasu wacapange mapelaela mulralrakai ki pakadulasu ka umawmase.

²⁷ Kiatubiaku muswane pakilringava pathavungu liniane, kwi lalasu lani kai maka malra ku sapalribulanesu.

²⁸ Ku nagane lini ani twalai ki niake ki mibusu kisupilri; kwi lalasu ani kai kipikai ki lanagane ki kawkawlusu.

²⁹ Ai, wangeange kai kidremedremeli, kwalrialriaku; Twaumase, kiatubiaku muswane palakebaili, palribulaili.

³⁰ Lri arakaiyaku ku senai drengedrengere ki Twaumase; lri arakaiyaku ku kiaseasenane pelaela pasalraelre ku sanianganeini.

³¹ Kikai lrika akiraragadhane ki Tamatama, ka walribate lu patarumarane ku sawvalai ka lwange, la lribate lu patarumarane ku kiatulrepenge ku lrubungu lawngu ki lrulai ka lwange.

³² Ku kiadredredrepete ku umawmase lu drelenga lri kiraragai; lai lri aru sapukwane ku wasukusukubu ki Twaumase ku umawmase.

³³ Ku Tamatama kialalra ki kwalrialrialri ka umawmase; kai marimurimuru ki yataememengane ka kawkawluini.

³⁴ Kai belenge si lebe ani drengedrengere ki Twaumase makanaelre; kai laveke si yakai adringi sanaka panianianiake ani drengedrengere makanaelre iniane.

³⁵ Ku Twaumase lri palribulu Ziyungu, si tupela tucekele ki cekele Yuda; ku kawkawluini lri ikai kwini, si simanemanenga kwini ki kadaengane.

³⁶ Ku mwabaibalrithi ki sasiakawluini lri mucungulu kwini ki kadaengane; ku akuli iniane lri ikai kwini.