Lasenai 68 - Ngudradreadrekadhane Ka Sisiu 魯凱語聖經

Wakelakela takuputaritariri ka senai

Tusenai ki Davidi. La baai ki tarasangililuku ki sikatai.

¹ Ku Twaumase ngiadrakale saladha pathirakupu ki labadhaini; ku malisilisi iniane ku umawmase twalai cucubungu iniane mawbebere makanaelre.

² Mia ki ebelre ka kiaipi si sarau, kwi lasu pakatwase liniane; mia ki rusuku kiderenau, ku manganga ka umawmase yakai cucubungu ki Twaumase kiamudu.

³ Ai ku madringelrese ka umawmase kiarararagai, yakai cucubungu ki Twaumase senasenai kirararagai.

⁴ Papia ki Twaumase senai, drengedrengere ku naganeini; pasikaiya kudra ki waililuku ki ememe padulru ku kadalranane. Amanini ku Tamatama; kunumi ikaiya cucubungu iniane itituku kiraragai.

⁵ Ku Twaumase yakaikai ki saniange ka daaneini; siaraparapale ki lapakulrulrulu, palakelakebe ki lawalibakane.

⁶ Wabaai ku daane kudra ki masepesepele ka umawmase, ku kiaemenge ka umawmase la kipulatadre; ai kudra wabaebaebalre ka umawmase lri ikai ubulane.

⁷ Twaumase, lu aswalalalasu dadavace ikai cucubungu ki kawkawlusu, ililuku liniane lribate ki ubulane calragulragu yai,

⁸ ngiavelevele kai kadaengane, la udale tarwadrau; asi lwiyane ku Twaumase ki Sinai mwataluvaivai, ku Twaumase ki swa Iseraylri wakela mulebe.

⁹ Twaumase, pwalebesu ku tarwadrau ka udale; pakalrekesu ku meameale ka kadaengane.

¹⁰ Ku kawkawlusu yakai kwini sutelrai; arakaisu ku sakialibake sirapale ki matiakukuru ka umawmase.

¹¹ Ku Tamatama pakatwase ku drekase, la turededele ku labaibai katwase padaruru ku matiakiragai ka vaga:

¹² Ku latalialalai si lakwapingi lini mawabeberenga! Ku yakai tavanane ku labaibai kiatudrulru ku niravasane ku lawbubulu:

¹³ Ku lanicabwane ara gingi ka nitutavagwane, kudra lasapakepake lini walikalikathe ku kakingiane. (Ani ikaai ku laumawmase ku kialepenge ikai takivane lu kikaruburuburu?)

¹⁴ Ku wadulru sanaka manemane ka Twaumase yakai lregelrege Zalemungu pasarau ki latalialalai, pwalebe ku maadrau ku pasabu.

¹⁵ Matiasalru turamuru ka lregelrege Basane; makalra ku abelenge ku lalregelregesu.

¹⁶ Asu thuru twalai belenge ki abelenge ka lregelrege ara pathalrane drele paswalebe ki pilri ki Twaumase ka taikaikaiyane ka lregelrege Ziyungu? Ku Tamatama lri palralrawthu ikai kai ki lregelrege!

¹⁷ Ku Tamatama lri ililuku ku tathathatha ku rigi ka kwapingi twalai Sinai mudaane ki Alrivilrivi ka taikaikaiyane.

¹⁸ Ku Twaumase mwa subelebelenge, mailuku ku takaalra ku niravasane; tarwamara ku lamanemane ku padulru ki lawabaebaebalre. Ku Tamatama ka Twaumase lri ikai kwini taelre liniane.

¹⁹ Drengedrengera ki Tamatama, asi lwiyane siamece lukakaiyaiyaiya ku ameceta; amani ka palribulu mitane ka Twaumase.

²⁰ Ku Twaumaseta amani kudra palribulu ka Twaumase; amani ka Tamatama, ka palribulu mitane pakidaili ki apacadhane ka Tamatama.

²¹ Ku Twaumase lri tara cwake ku laawlru ki badha, lri tupuru ku awlru ki pasalrisalriu ka makelraelrathe ka umawmase.

²² Ku Tamatama amianga kai: Lri malraku ki labadha numi patwalai ka lregelrege Basane ililuku kainganai; lri patwaladhaku adringi ki laveke iluku pasiwlri liniane,

²³ lanu ngukakai ki erai lini lribate; ku tawpungu numi lri dilace ku erai lini.

²⁴ Twaumase, ku taturededelanesu takuputaritariri wadrele ka laumawmase; wadrele makanaelre ki Twaumase ka talialalaili sa mudaane ki Alrivilrivi ka taikaikaiyane.

²⁵ Ku tarasenasenai yacucubungu, ku tarapatungutungutungu la ikai lrilrikudru, ku pakilrikilringi ku lavavalake ka ababai la ikai kabicelrakane.

²⁶ Kunumi ikaiya ki tayelrelreane ki laumawmase drengedrengere ki Twaumase; lamwabaibalrithi ki Iseraylri, drengedrengera ki Tamatama makanaelre!

²⁷ Ku titikiyanenga ka swa Biniyamingi aswalalala icucubungu, ku bibilrili yakai ku taramasasangililuku ki swa Yuda si taratupapapalra liniane, la pacungulu ku taramasasangililuku ki swa Zibulungu si swa Napetali.

²⁸ Twaumase, kiatubiaku muswane putaluvaivadha ku madrau ka pukusu, putaluvaivadha kudra nataarakaiyane pasikai naiane ku puku.

²⁹ Patwaladha Yerusalrime ki daanesu, ka amani kudra taikaiyane sailuku ku latalialalai ku padulru si baai muswane, kiatubiaku muswane putaluvaivadha ku madrau ka pukusu.

³⁰ Kiatubiaku muswane kaelaela ki swa Izipiti kudra ki yakai ki mawtiririvu ka waudriwdripi; kaelaela ki lakuni kudra ki lasawvalai ka lwange si lalrulai ka lwange, pakeela ku tapatupapalrane lini makanaelre, si patarumara muswane ku gingi. Kiatubiaku muswane pasawvagavagadha kudra ki la madalame kikaruburu ka minzuku.

³¹ Yakai ku nisikawlane ku twalai ka Izipiti kainganai; ku swa Kuse lri cidingi ku alrima si papia ki Twaumase inulri.

³² Sanaka kuni kawmasane, drengedrengera ki Twaumase; kunumi drengedrengera ki Tamatama.

³³ Drengedrengera kudra twalai kunadruma ngukakaikai subelebelenge ka Tamatama; kilalra, paelraelrange ku matiamukuludru ka lingau.

³⁴ Kunumi pelaela pasalraelre ku maadrau ka puku ki Twaumase; ku matisalrwaneini wakabungu ki swa Iseraylri; ku pukuini salraelre subelebelenge.

³⁵ Twaumase, lu ikaisu ki Alrivilrivi ka taikaikaiyane matiaukuludrusu turamuru! Ku Twaumase ki swa Iseraylri patarwamara baai ku puku si kindri ki kawkawluini. Kunumi makanaelre drengedrengera ki Twaumase!