Lasenai 66 - Ngudradreadrekadhane Ka Sisiu 魯凱語聖經

Wadrengedrengere kiaseasene ka senai

Vaeva ka senai. La baai ki tarasangililuku ki sikatai.

¹ Sanaka umawmase makakawkava kiraragai drengedrengere ki Twaumase!

² Senadha drengedrengere ku lriguini; papia iniane patarumara ku sadrengedrengerane ka vaga.

³ Papia ki Twaumase iya kai: Ku tapianesu ala matiasamaali! Asi lwiyane ku adravane ki pukusu, ku badha lri papia muswane kusange.

⁴ Kai kawmasane sanaka umawmase wasukubu muswane makanaelre; kwi lalasu wadrengedrengere muswane, senai drengedrengere ku nimusakenane ka naganesu.

⁵ Bwala, bwala si drele kai madrau turamuru kai tapiane ki Twaumase; bwala si drele kai matisamaimali kai tapianeini ikai kawmasane.

⁶ Paakameamealane ki laveke, la dadavace lribate ku cucungulaneta; ikaita kavai ngwalai ki tapianeini si kiraragai.

⁷ Arakai ku madrau ku puku si palralrawthu magagemegeme; ku macaini wadrele ki sanaka kuni; lawabaebaebalre, madha ngitatwabelebelenge ngitatwadrau.

⁸ Sanaka umawmase, drengedrengera ki Twaumaseta; ku sadrengedrengerane ki Twaumase ka lingau ani salraelre kidruanga.

⁹ Ku Twaumase palakebe ki niaketa, la kaita tubakebake.

¹⁰ Twaumase, wathalethalesu naiane; kialrialringawsu naiane, mia ki gingi ngukakai ki apwi kithalethale.

¹¹ Pamwalrabukusu naiane mwa ki lravathe, la patukudrusu naiane ku matelrege ka amece.

¹² Padradredresu ki badha naiane; pangwakakaisu naiane ki telebe si kelrabe ka apwi, ai kikainga piakaisu naiane ki tasutelraadhane.

¹³ Lri ilukaku ku Lama ka lrisi mudaane ki daanesu; lri papiaku muswane sawlri ku kiketeketeli.

¹⁴ Ku kiketeketeli ikai ki takwalrialriane, lri sawlriaku patarumara.

¹⁵ Lri patarumaraku ku alamane ka kiu; lri patarumaraku ku sawvalai ka lwange si kiu; ku sangulremane ki nipatarumarane wadaruru subelebelenge.

¹⁶ Mwasakene mukuludru ki Twaumase ka laumawmase, bwala kainganadha makanaelre si kilalalra; lri pelaelaku ku tapasikaiyane mitane pia ku matiasamali.

¹⁷ Kiatubiaku iniane ku aparalubane; la mialriaku papia iniane senai ku sadrengedrengerane ka senai.

¹⁸ Alaiyasi tudreadrekasaku ki pasalrivaneli, ku Tamatama kai lri tukurwane kilalra nakwane.

¹⁹ Ai ku Twaumase kialalranga; twakurwanenga si kilalra ku inulrili.

²⁰ Lri drengedrengeraku ki Twaumase, asi lwiyane kai pasiaulri ku inulrili, la kai sawlri ku palralrawthu ka sakialibakeini.