Lasenai 65 - Ngudradreadrekadhane Ka Sisiu 魯凱語聖經

Wadrengedrengere si kiaseasene

Tusenai ki Davidi. La baai ki tarasangililuku ki sikatai.

¹ Twaumase, nai ikai nai makanaelre Ziyungu si drengedrengere muswane; nai sawlri nai baai muswane ku nikiketeketanenga,

^2-3 Asi lwiyane kialalrasu ku nikitubiane. kai umawmase ngwalai ki tapasalrivane lri tara kainganai kitubi muswane. Ku tapasalrivane nai pamaki naiane, ai pacepengasu patuelre.

⁴ Ku pilrisu ku umawmase si ililuku ikai ki Alrivilrivi ka taikaikaiyane lri kaesai turamuru! Lri ngulwadhane nai ku tharirane ki taikaikaiyanesu, si kudra sakiararagai ki daanesu.

⁵ Twaumase, kialalrangasu naiane, si paakaci naiane; arakaisu kwi palrealrebane ka tapiane kainganai palribulu naiane. Kai kawmasane sanaka umawmase si yakai kidruanga ka umawmase satalu muswane makanaelre.

⁶ Pwataluvaivaisu ku maadrau ka pukusu; arakaisu ku puku pakapapedrenge ki lalregelrege.

⁷ Paisaselebanesu ku lisiane guruguru ki laveke si bikabiki; paidrengeresu ku rariavane ki sanaka umawmase.

⁸ Kai kawmasane ngwalai ku tapianesu ku maadrau ka awngane si kababitingi musakene; twalai ki talrawane ki vai pakela ki talriwgane ki vai, ku laumawmase ngwalai ki tapianesu si kiraragai makakawkau.

⁹ Siarapalesu ki kadaengane, si pulebe ku udale pakaalreke; pakalrangesu ki kadaengane la tutaleke. Ku patarumarasu ku kadravane swaete ku acilai; kaisu watelrai patutaleke ki kadaengane.

¹⁰ Paswaetesu ku udale ki takauawngane, la ara acilai dapenge ki kadaengane; pathethengesu mamelre ki daedae, si pacebe ki lalredelrede ka taleke.

¹¹ Patarwamarasu subulrubulru la ngukalra ku taleke ki caicaili; sanaka tadarurane ki drapalesu makalra ku lataleke.

¹² Ku tapagwagwagwane twaredededele ku lalwange si lakiu; ki lalregelrege swaete ku lingau ki kiarararagai.

¹³ Ku lalwange si lakiu wakerape ubulane; ku lataleke swaete ki lavalrwalru. Sanaka manemane kiararagai senai akwadrau.