Lasenai 64 - Ngudradreadrekadhane Ka Sisiu 魯凱語聖經

Kiatubi ku akipalakebane

Tusenai ki Davidi. La baai ki tarasangililuku ki sikatai.

¹ Twaumase, kiatubiaku muswane kilalra kai tadanganeli; kiatubiaku muswane pakidailaili ki ngikarakacanane ka badha.

² Kiatubiaku muswane palakebaili ku kaika alelepengane nakwane ki manganganga ka umawmase, ku kaika akikabebetethaneli ki matiamukuludru ka umawmase.

³ Kwi lridame lini marangisi, mia ki lrabu ku rangisane, mia ki walraili ku duku ka vaga.

⁴ Kwi lalasu walepenge lri vutha lraili papacai ki umawmase; lri makakaai lraili, ka kadrwa ku ulalengane.

⁵ Kwi lalasu mapwatatata, madrekadrekase si pia ku ngialisiane; kwi lalasu wakikake kibubuli ku apulravathane. Kwi lalasu amia kai: Aneane kulri drele mitane?

⁶ Kwi lalasu madrekadrekase ku apiane, la iya kai: Kai kikaketa mamwamwa turamuru; kai takidremedremane ki umawmase makucingalrelringa thingale.

⁷ Ai ku Twaumase arakai ku lraili si lraili liniane, kwi lalasu ala pangitutuluku kadula.

⁸ Ku Twaumase lri singikai ku vaga lini amudu liniane; ku wadrele liniane ku umawmase waveteevete ku awlru makanaelre.

⁹ Mwakuludru makanaelre; kwi lalasu lri pelaela ku takaungane ki Twaumase, si kidremedremedreme ku tapianeini.

¹⁰ Ku madringelrese ka umawmase lri satalu ki Tamatama, lri ngwalai iniane si kiraragai; ku madringelrese ka umawmase lri drengedrengere iniane makanaelre.