Lasenai 63 - Ngudradreadrekadhane Ka Sisiu 魯凱語聖經

Akuli turamuru ki Twaumase

Tusenai ki Davidi saikai calragulragu kavai Yuda.

¹ Twaumase, amanisu ku Twaumaseli; kiapasilasilapaku muswane! Mia ki meameale ka kadaengane, ka makadhame, ka kadrwa ku acilai ka umawma, siadraamaku muswane, akuli muswane turamuru.

² Kiatubiaku muswane nau ikai ki Alrivilrivi ka taikaikaiyane drele muswane; nau drele ku maadrau ka pukusu si lrigusu.

³ Ku palralrawthu ka sakialibakesu makuciacingalre ki niake, ngwalai kikai lri drengedrengeraku muswane.

⁴ Kai tapanianianiakaneli ikai kawmasane lri kiaseasenaku muswane; lri cidingaku kai alrima si papia muswane inulri.

⁵ Kai rili lri ngulwadhane ikai ki tangiakaneanane; lri papiaku muswane senai ku kiarararagai ka sadrengedrengerane ka senai.

⁶ Lu apecaku ikai tapeapecane ngwalringavaku muswane; watalearaku kidredredreme muswane.

⁷ Asi lwiyane taparalubanesu nakwane; yakaiyaku ki tapalakebane ki sapakepakesu senasenai kiraragai.

⁸ Tatupapapalraanaku muswane; ku vanalesu waarake nakwane.

⁹ Kudra la kiasanu papacapacai nakwane ku umawmase, lri muswadriadringi makanaelre.

¹⁰ Kwi lalasu lri kiara lrabu pacai, ku lawapacai ku kinawmasane lai lri kikane ki tawpungu ubulane.

¹¹ Ai, ku talialalai lri ngwalai ki Twaumase kiraragai. Sanaka papia ki Twaumase kiketekete ku umawmase lri drengedrengere iniane makanaelre; ku ngudwi ki taratavuvuvulrucu lri kitamenge.