Lasenai 61 - Ngudradreadrekadhane Ka Sisiu 魯凱語聖經

Kiatubi ku akipalakebane

Tusenai ki Davidi. La baai ki tarasangililuku ki sikatai, si arakai ku patungutungu paungugake.

¹ Twaumase, kiatubiaku muswane kilalra kai kitubili; kiatubiaku muswane kilalra kai inulrili.

² Yaadaailaku ki tavanane, la kwalrialri kai kidremedremeli, lri papiaku muswane kitubi. Kiatubiaku muswane ililukaili mwa ki tasutelradhane ka takilakelakebane,

³ asi lwiyane amanisu ku takilakebaneli, ka alradreli kiecebe ki labadha.

⁴ Kiatubiaku muswane pukawnaili pikai nakwane adringi ki balrawbawsu; nau kipalakebe ikai lebe ki sapakepakesu.

⁵ Twaumase, kialalrangasu ku kiketeketeli; kudra naika amalrane ki mwasakene mukuludru muswane ka umawmase ku tacekecekelane wabaaisu nakwane.

⁶ Kiatubiaku muswane drima ki talialalai ku apanianiakane ka caili; kiatubiaku muswane ku cailini ani kalragi ka kadrwa ku talikaiyane.

⁷ Twaumase, kwi lasu ani ikai cucubungu muswane ka palralrawthu gemegeme ku puku; asu arakai ku takapatengatengananesu si kai lri kaela ku sakialibake palakebe iniane.

⁸ Lu kamiyaiya kikai, lri palralrawthaku senai drengedrengere muswane; lukavaivai lri pangimiaku kudra kiketeketeli muswane.