Lasenai 60 - Ngudradreadrekadhane Ka Sisiu 魯凱語聖經

Kiatubi ki Twaumase ku akipalribulane

Ku Davidi saikai kavai Mesuputamia si Zuba kikaruburuburu ki swa Arame, ku Yuabe ngiabangulu siwlri, si ikai valrwalru ka Timu papacai ki ta 12,000 ka swa Idume, sakamani kwini ku Davidi twasenai kikai senai kai ka nitukucingaalrane mia ki kingi, ka sabulrwane pangitatupela ki umawmase. La baai ki tarasangililuku ki sikatai, ku lingau arakai ku “Sasiwmiane ka bariangalai”.

¹ Twaumase, wacilringasu naiane, la paamakisu naiane; napapiasu naiane kalisi, kaiasasane kiatubi nai muswane pangiradhekana naiane.

² Napalingilingisu ki kadaengane, si paegacane; kaiasasane kiatubi nai pakabibilrila palribulu, asi lwiyane macacwakenga.

³ Pakiapadradresengesu ki kawkawlusu ku makaalra ku akwalriane; patwabakebakesu naiane, mia ki waungulu ku makecenge ka bava.

⁴ Pasiakaisu ki mwasakene mukuludru muswane ka umawmase cegecege ku kalralradha, ku kaika akitupasalrivanane.

⁵ Kiatubi nai muswane palrainga naiane, arakaiya ku pukusu palribulu naiane, lani kipalribulu ku kawkawlusu ka kadalamesu.

⁶ Ku Twaumase twalai ki Alrivilrivi ka taikaikaiyaneini avavaga: Lri akaciaku, si apawvagavagai ki swa Sekeme; lri malraku ki Sukuthe vala baai ki kawkawluli.

⁷ Kai Gileade nakwane, kai Manase la mialri ka nakwane; kai Iparaime yai talrupunuli; kai Yuda yai puku ka ukudruli.

⁸ Lri arakaiyaku ki Muabe tutatawdrapadrapalane, la papia ki Idume verevere ku kece; lri papiaku ki swa Pelisitine senai putariri.

⁹ Twaumase, aneane kulri ililuku nakwane pudaane kai ki makecenge ka cekele? Aneane kulri ililuku nakwane mwa Idume?

¹⁰ Twaumase, tengaanengasu cilri naiane? Kaisu lri tupapalra ki kwapingi nai karedele kikaruburu?

¹¹ Kiatubi nai muswane paraluba naiane kidresenge ki badha, asi lwiyane ku paralubu ki umawmase kadrwa ku paluludane.

¹² Ku Twaumase tapalra naiane, lri tara akaci nai; lri tara paamaki ki badha nai.