Lasenai 6 - Ngudradreadrekadhane Ka Sisiu 魯凱語聖經Ikai ki takipakwalrialriane kiatubi ku akiparalubane Tusenai ki Davidi. La baai ki tarasangililuku ki sikatai, la arakai ku patungutungu paungugake. Ku lingau ngwasaka valru. 1 Tamatama, kiatubiaku muswane madha kalisilisi si kaelaela nakwane; lu icengecengesu kalisilisi madha pathavuthavungu nakwane! 2 Tamatama kiatubiaku muswane kakalithaili, asi lwiyane pasuludrunga naku; Tamatama sulravaili pawdringai, asi lwiyane kadrwanga ku pukuli. 3 Kai kinawmasaneli kai kidremedremeli la mialri kwalrialri; Tamatama, kikai akwalriane lri pakela lwigane? 4 Tamatama, bwala kainganadha si palribulu nakwane! Asi lwiyane makalithisu nakwane, palribulaili! 5 Kadrwa ku umawmase ku yakai ki tadralredralrekane ngulringau muswane! Ku swadriadringi laka kadrwa ku umawmase ku wadrengedrengere muswane! 6 Ngwaladhaku ki dange si kidulru; lukamaungu yataburu ikai ki lrese kai tapeapecaneli, madapengenga kai tawlrwaneli. 7 Patubi nakwane ku badhali; madirele ubalrake kai macali, si kadrarumadrimi. 8 Manganganga ka laumawmase, lu katwasa! Asi lwiyane ku Tamatama kialalranga kai tatubianeli. 9 Ku Tamatama kialalra kai takaralealaneli kitubi ku akiparalubane; ku Tamatama palrainginga kai inulrili. 10 Ku badhali lri kitusinalrelreme si amalebe; kwi lalasu lu mukulukuludru kai thingale ku apiane, lri yasasane katwase siwlri. |