Lasenai 59 - Ngudradreadrekadhane Ka Sisiu 魯凱語聖經Kiatubi ku akipalakebane Ku Saule siakawlu ki umawmase kadrenge ki daane ki Davidi, lri papacai iniane, ku Davidi la tusenai kikai senai ka nitukucingaalrane mia ki kingi. La baai ki tarasangililuku ki sikatai. Ku lingau arakai ku “Madha kalisilisi”. 1 Twaumaseli, kiatubiaku muswane palribulaili pakidaili ki labadha; kiatubiaku muswane palakebaili pakidaili ki lri kikaruburu nakwane ka umawmase. 2 Kiatubiaku muswane palribulaili pakidaili ki manganganga ka umawmase, la nau kidaili ki alrima ki papacai ki umawmase ka umawmase. 3 Drela, ka lalasu walepenge lri kikaruburu nakwane; kai tangikararakacane ka umawmase yaelrelre lri kiecebe nakwane. Kaika ngwalai ku yakai ku tapasalrivaneli, ku manemane ku tapamamaneli. 4 Tamatama, kwi lalasu takwagirigiiringi tupasalrivane nakwane kainganai, kaika ngwalai ku manemane ku tapamamaneli. 5 Tamatama ka abebeelengenga ki sanaka kwapingi ka Twaumase, ngidrakala si paralubu nakwane! Twaumase ki swa Iseraylri, kiatubiaku muswane kamania ka wadrele! Kiatubiaku muswane ngidrakala si pathavungu ki lakuni; madha katharithariri ki lawabaebaebalre ka tanganganga. 6 Kwi lalasu lukamaungu kaiyanganai, mia ki yaubulane ka tawpungu alealeale, la ikai ki cekele masasawlriwlriwlri dadadavace. 7 Kilalra kwi tusinalrelrelreme lini si kukukuludru. Kwi lridame lini mia ki twalai ki ngudwi kainganai ka marangisi ka dramu, kadrwa ku kialalra ku umawmase la iyana kwi lalasu! 8 Ai Tamatama, mwalralrakaisu liniane; pwalrialrivalesu ki lakuni. 9 Lri satalwaku ki madradrawnga ka pukusu; Twaumase, amanisu ku takilakelakebaneli. 10 Ku Twaumaseli madalame nakwane, lri kela paralubu nakwane; lri padrele nakwane ku taamakiane ki labadha. 11 Twaumase, madha papacapacai amudu liniane, lukamiyaiya kikai, ku mapapangaleli kai lri karimuru. Tamatama, amanisu ku palakebe naiane; kiatubiaku muswane arakaiya ku pukusu pasawvagavagai liniane, si kabebetethe liniane. 12 Swaete ki ngudwi lini ku pasalrivane, ku bibiane si lridame pasalriivanenga; kwi lalasu ani kipatubakebake ki ngikalrilrigwane lini. Asi lwiyane kwi lalasu maelaela pusu, watavuvulrucu, 13 kiatubiaku muswane papia liniane kalisi, si amudu liniane; kiatubiaku muswane pakitulrepeenga amudu liniane. Lukamiyaiya kikai, sanaka umawmase lri thingale makanaelre ka Twaumase ku warathudu ki swa Iseraylri; ku tarathudaneini wasalraelre kawmasane. 14 Ku labadhali lu kainganai ki maungu, mia ki yaubulane ka tawpungu alealeale, la ikai ki cekele masasawlriwlriwlri dadadavace, 15 mia ki yaubulane ka tawpungu katwatwatwase mwa kidruanga, silasilape ku akaneane, sana kai kabucuku la alealeale kai icelrecelrebe. 16 Ai lri senadhaku drengedrengere ku pukusu; lukamialrealre lri akwadravaku senai ku sakialibakesu ka palralrawthu. Takamanianesu ku takilakelakebaneli; lu kwalrialriaku amanisu ku takilakebaneli. 17 Takilakebaneli, lri drengedrengeraku muswane; ku Twaumase takilakelakebaneli, mathalrai nakwane ka Twaumase. |