Lasenai 57 - Ngudradreadrekadhane Ka Sisiu 魯凱語聖經

Kiatubi ku akiparalubane ka inulri

Ku Davidi samubere ki Saule, si kilepenge ikai ki barungulu yai, twasenai kikai senai kai, ka nitukucingaalrane mia ki kingi. La baai ki tarasangililuku ki sikatai. Ku lingau arakai ku “Madha kalisilisi”.

¹ Twaumase, kakalithaili, kiatubiaku muswane kakalithaili, asi lwiyane wakelaku satalu muswane. Lri ikaiyaku lebe ki sapakepakesu kitubi ku akipalakebane, pakeela ku angilribatane ki umuku ka matikurwane.

² Kiatubiaku ki Abebeelengenga ka Twaumase, papiaku ki Twaumase kitubi ka amani ku wababaai ku urikaikaili patuelre.

³ Lri twalai belenge palraingi nakwane, palribulu nakwane; lri lrumai pasiwlri ki wadredredrepete nakwane ka umawmase. Ku Twaumase lri papia nakwane paathingalane ku takapatengatengananeini si kai akabalribalrithi ku sakialibake.

⁴ Kiathalringulaku ki labadha; kwi lalasu mia ki tarakanekane ki umawmase ka raiyungu. Ku valisi lini mia ki idiri, mia ki lraili; ku lridame lini mia ki rangirangisi ka dramu.

⁵ Twaumase, ku matiwsakenanesu ani utaluvaivai ikai subelebelenge; ku lrigusu ani salraelre ki kadaengane.

⁶ Ku badha wapaipai ku lravathe lri pwalra nakwane; kiadrepetenga naku ki matikurwane. Kwi lalasu piakai cucubungu nakwane lruku ku lrubange, la ngikakamanilringa mulrubangane.

⁷ Twaumase, malrithethe kai kidremedremeli, kainaku lri lrudralrudrai; lri senadhaku, lri drengedrengeraku muswane.

⁸ Kidremedremeli, kasimeaca ngidrakale! Lebere, patungutungu, kasimeaca ngidrakale! Adravane ka vai lri aceacaku pangidrakale!

⁹ Tamatama, lri ikaiyaku ki lakuni kiaseasene muswane; lri ikaiyaku ki sanaka umawmase drengedrengere muswane.

¹⁰ Ku palralrawthu ka sakialibakesu wadaruru kavai subelebelenge; ku takapatengatengananesu ku abelengane wadaruru ki talikaiyane ki ememe.

¹¹ Twaumase, ku matiwsakenanesu ani utaluvaivai ikai subelebelenge; ku lrigusu ani salraelre ki kadaengane!