Lasenai 56 - Ngudradreadrekadhane Ka Sisiu 魯凱語聖經

Satalu ka inulri

Ku Davidi sakipwalranga ikai kavai Gathe ki swa Pelisitine, twasenai kikai senai kai, ka nitukucingaalrane mia ki kingi. La baai ki tarasangililuku ki sikatai. Ku lingau arakai ku “Yadaaili ka kadrwa ku lingau ka tavagu”.

¹ Twaumase, kakalithaili, asi lwiyane kiakikaruburuburaku ki umawmase; ku badhali twarakete dredredrepete nakwane.

² Ku badhali kai watelrai kikaruburu nakwane; takalra turamuru ku kiaececebe nakwane!

³ Sana ngitulukaku si mukulukuludru, satalwaku muswane.

⁴ Lri satalwaku ki Twaumase, drengedrengere ku pukawnungaini; satalwaku ki Twaumase, kainaku mwakuludrunga. Kai umawmase lri dulru tumane nakwane?

⁵ Ku badhali twarakete kisanu kabebebetethe nakwane; arakai sanaka manemane kisanu tulisilisi nakwane.

⁶ Kwi lalasu marededele lepelepenge, dredrele ku tapudrapalaneli, si mukalavalava ku apapacadhane nakwane.

⁷ Twaumase, kiatubiaku muswane pathavunga ki pasalrivane lini; kiatubiaku muswane papia liniane kalisi, si patubakebake liniane.

⁸ Wathingalesu kai kipadradresengeli kikai matikurwane; la pulringawsu ku taalralreseaneli. Kikai patuelre kaika wapacase pikai ki mibusu?

⁹ Sana papiaku muswane kitubi, ku badha amaaki; ngwaladhaku kikai si thingale, ku Twaumase ala ka paraluralubu nakwane.

¹⁰ Lri satalwaku ki Twaumase, drengedrengere ku pukawnungaini; lri drengedrengeraku ku pukawnunga ki Tamatama;

¹¹ Satalwaku ki Twaumase, kainaku mwakuludrunga. Kai umawmase lri dulru tumane nakwane?

¹² Twaumase, lri pangimiaku kudra kiketeketeli muswane; lri papiaku muswane patarumara kai sakiaseasenane.

¹³ Asi lwiyane palribulusu nakwane pakidaili ki apacadhane, la kainaku matikuru turamuru ku taamakiane, ala dulrwaku panianiake icucubungu ki Twaumase, ikai kudra ki ledra ki patarwamara ku niake.