Lasenai 55 - Ngudradreadrekadhane Ka Sisiu 魯凱語聖經

Kiatubi ku akiparalubane ka inulri

Tusenai ki Davidi ka sabulrwane ka senai. La baai ki tarasangililuku ki sikatai, si arakai ku patungutungu paungugake.

¹ Twaumase, kiatubiaku muswane tukurwana si kilalra kai inulrili; madha ngikawlrawlravane si padrwadruma kai kitubili.

² Kiatubiaku muswane kilalraili, si tubalre nakwane; ngwaladhaku ki thekelrane kiadulrunga naku turamuru.

³ Ku sakukuludrane ki labadha, satulilisiane ki manganga ka umawmase, waupungu nakwane turamuru. Kwi lalasu wadrimadrima baai nakwane ku amatikurwane; kwi lalasu papia nakwane kalisi, mavalracevace nakwane.

⁴ Swaete ki kidremedremeli kai kwalriane; ku matikiwcane ki apacadhane wacwakenga nakwane.

⁵ Ku manugeregerane ki kiwcane waruthukunga nakwane; ku matikiwcane wakabungu nakwane.

⁶ Apia ikaiyaku ku sapakepake, mia ki tavagu, la dulru ngipalai si silape ku amwane isadra!

⁷ Lri mwaku adaaili ngipalai, si sulai ikai ubulane.

⁸ Lri kisamulaku ngipapasikai silape ku taikaikaiyane kilakebe, ku auberaneli ki umuku.

⁹ Tamatama, kiatubiaku muswane pakaapuca ku vaga ki labadha! Wadrelaku ikai ki cekele malrithavuthavulu makalililisi;

¹⁰ kwi lalasu piavaiyane pimaungu dadadavace ikai ki kepale ki cekele; yakai kidruanga ku pasalrisalriu, ku amatikurwane.

¹¹ Yakai kidruanga ku mabebebetethe; ikai kadadalranane ki cekele swaete ku wadredredrepete si watavuvuvulrucu.

¹² Alaiyasi tumeamelrace nakwane ku badha, lri dulrwana naku kiadili; alaiyasi dradrarane nakwane ku ecebaneli, lri dulrwana naku mubere.

¹³ Ai kainaku wathingathingale, ala lrika amanisu ka palrali, ka thingathingaleli, ka katalragianengali!

¹⁴ Namaka kiasudalruta makakawrivariva; namaredeleta mwa ki daane ki Twaumase sukubu.

¹⁵ Ku apacadhane ani pangitutuluku mulebe mwa ki badhali; kwi lalasu ani panianianiake tuverevere muswadriadringi. Asi lwiyane ku daane lini ku kidremedreme lini swaete ku ngilisianane.

¹⁶ Ai, lri papiaku ki Twaumase kitubi ku akiparalubane; ku Tamatama lri tara palribulu nakwane.

¹⁷ Adravane ka mialrealre, ka mwalringedele, ka maungu, lri papiaku iniane tubi dange si pelaela ku takivuthaneli; lri tara tukurwane si kilalra nakwane.

¹⁸ Lu ikaiyaku ki takikaruburuburane si maicubungu ki takalra ka badha; lri ililuku nakwane patwalai ki takikaruburuburane kasulivate siwlri kainganai.

¹⁹ Kwidra twalai ku nadrumadrumadruma magagemegeme ku puku ka Twaumase lri tara kilalra nakwane, si pamaki liniane; asi lwiyane kwi lalasu kai mwabangalre akabalrithi, kai mwasakene mukuludru ki Twaumase.

²⁰ Kudra napapapalrali, kiakaruburu ki talragini; wabaebalre ku natapalrainganeini kawriva.

²¹ Ku bibianeini mathathuthulridi ki abera, ai swaete ki kidremedreme ku lisiane. Ku vagaini la ka madaedapenge ki abera, ai ku patengatengane mia ki dramu ka marangisi.

²² Ku matelrege ka amece nai sararesu baai ki Tamatama, lri tara arake muswane; kai lri pamaki ki madringelrese ka umawmase lutumane.

²³ Ai Twaumase, kudra ki la pasalriu pwa lrudrulu puswadriadringi, papacadha kudra ki taratavuvuvulrucu; ai patharukai nakwane, lri savaeva kai kidremedremeli satalu muswane.