Lasenai 52 - Ngudradreadrekadhane Ka Sisiu 魯凱語聖經

Sasaibangane si migemi ki Twaumase

Ku swa Idume ka Duige sa pelaelanga ki talialalai ka Saule ku Davidi wamwa ki daane ki Ahimileke iya, ku Davidi twasenai kikai sabulrwane ka senai. La baai ki tarasangililuku ki sikatai.

¹ Kusu ka yakai ku puku ka umawmase, asu piya ku ngialisiane si ngikalrilrigu? Ku sakialibake ki Twaumase palralrawthu kai akabalrithi.

² Kwi lridamesu wamudu ki palrapalra, mia ki sakirikiritane ka marangisi, kaisu watelrai beabekace ku kaika tangimiane si tulisi ki umawmase.

³ Madalamesu ki ngialisiane, la kavalracevacesu ki mathariri; madalamesu ki kaika patengane, la kalrasesu ki patengane ka sabulrwane.

⁴ Kusu ka matavuvulrucu, madalamesu pakadula ki palrapalra!

⁵ Ngwalai kikai, ku Twaumase lri pudriadringai amudu muswane; lri ruthuku muswane, lai alra bilibili muswane patwalai tavanane; lri patwalai ki umawmase patala baalace akucu muswane.

⁶ Ku madringelrese ka umawmase lu drele kikai lri mukuludru; kwi lalasu lri ulralrakai muswane si iya kai:

⁷ Drela, kai lasu amani kwidra kai satalu ki Twaumase; kwi lasu satalu ki tacekecekelaneini, ki nganganeini sikakathane.

⁸ Ala kwaku yai, miaku ki angatu ka ulrive ka wacebecebe ikai ki daane ki Twaumase; lri palralrawthaku satalu ku kai lri kaela palralrawthu ka sakialibake.

⁹ Twaumase, ku tapianesu lrika palralrawthaku kiaseasene; lri ikaiyaku ki kawkawlusu pelaelaela pasalraelre ku thariranesu.