Lasenai 51 - Ngudradreadrekadhane Ka Sisiu 魯凱語聖經

Kiatubi ku akipacepane

Ku Davidi sa tadrusanga apece ki Batheseba, la kela kikawriva iniane ku yuginsia ka Nathange, ku Davidi twasenai kikai senai kai. La baai ki tarasangililuku ki sikatai.

¹ Twaumase, kiatubiaku muswane kakalithaili, asi lwiyane yakai ku sakialibakesu ka palralrawthu. Kiatubiaku muswane mwalra kai tapasalrivaneli, asi lwiyane yakai kwi kai maelaela kwi thalradhanesu.

² Kiatubiaku muswane mwalra kai ngilisiananeli, si sinau kai pasalrivaneli!

³ Wathingalaku ku tapasalrivaneli; ngiathathingalaku ka taikaiyane ki pasalrivane.

⁴ Pasalrivaku muswane, ku pasalriwli yai amanisu; paiyaku ku ngialisiane iyasu. Ngwalai kikai, lu saibangesu nakwane mamamwa ki kakudhane; lu pathavungusu nakwane naika akipianeli.

⁵ Sakilrabuthaku ki ina amaninga kudra ngialisiane; kudra takitulalakane ka vai swaeteenga ku pasalrivane.

⁶ Ku murikaisu yai patengatengane ka kidremedreme; kiatubiaku muswane arakaiya ku lrigilanesu suete nakwane.

⁷ Kiatubiaku muswane mwalra kai pasalrivaneli, la nau kabula; kiatubiaku muswane sinavaili, la nau ka malrawlrapungu ki pasabu.

⁸ Kiatubiaku muswane pakilalraili ku lingau ki kiarararagai; adravane baburawngasu nakwane, kiatubiaku muswane ku atupelaneli kiraragai.

⁹ Kiatubiaku muswane memecana si kai drele kai pasalrivaneli, mwalra kai pasalriwli patuelre.

¹⁰ Twaumase, kiatubiaku muswane pasikaiyaili darepe ku vaeva ku mabula ku kidremedreme; kiatubiaku muswane patarumaraili baai ku vaeva ku bavane laka tengatengane ka ri.

¹¹ Madha patwalalai cucubungusu pakatwase nakwane; madha patwalalai ki kinawmasaneli dawlu pasiwlri ki Sirisu.

¹² Nau pelana kilrialringau ku sakiaragai ku tapalribulanesu, kai abakeli lani pasingikidremedreme kiraragai pasalaladha muswane.

¹³ Luka ngimiyaiya kikai, ku drekasesu lri arakaiyaku bulru ki pasalrisalriu ka umawmase; kwi lalasu lai lri papia muswane pasalaladha.

¹⁴ Palribulu nakwane ka Twaumase, kiatubiaku muswane pacepa kai apacadhane ka pasalrivaneli; lri akwadravaku drengedrengere ku dringelresanesu.

¹⁵ Tamatama, kiatubiaku muswane pamanungangaili; lri drengedrengeraku muswane.

¹⁶ Kaisu madalame ku sapatarumarane ka waudriwdripi, ana kadalamesu nai patarumaraku; la kaisu murikai ku Lama ka lrisi.

¹⁷ Twaumase, ku patarumarali ku sapatarumarane yai watubitubi ka abake; ku watubitubi ngitatasiwlriwlri ku kidremedreme kaisu pasiaulriwlri.

¹⁸ Twaumase, kiatubiaku muswane arakaiya ku thalradhane marasikai Ziyungu; kiatubiaku muswane tupela raedre ku balingibingi ki cekele Yerusalrime.

¹⁹ Lukamaninga kwidra, lai lri tarumarasu ku mamamwa ku sapatarumarane ka waudriwdripi, amani kudra Lama ka lrisi ka sakumia ka waudriwdripi; lukamaninga kwidra, yakai ku sawvalai ka lwange ku apatarumarane pikai ki tapatarumaramarane muswane.