Lasenai 50 - Ngudradreadrekadhane Ka Sisiu 魯凱語聖經

Patengatengane ku tasukubane

Tusenai ki Asape.

¹ Lu avavaga ku Tamatama ka sapupukwanenga ka Twaumase, maraleale ku tatwaladhane ngibwale si tamulebeane ki vai ku kadaengane.

² Twalai ki mathaithariringa ka cekele Ziyungu, ku Twaumase pathelare ku ledra.

³ Ku Twaumaseta lu lri kela mulebe, kai lri iceelrebe ka kadrwa ku lingau. Ku cucubunguini yakai ku wakelrakelrakelrabe ka apwi ku ngiathalringulu iniane yakai ku valrigi.

⁴ Wadawlu ki subelebelenge si kadaengane ka amani ku wasiwmi, pakai ku asaibangane ki kawkawluini.

⁵ Amia kai: Dawla sarubu ki patengatengane ka kawkawluli mwa nakwane kai, ka amani kwidra la arakai ku sapatarumarane ka waudriwdripi kiketekete nakwane ka umawmase.

⁶ Kai subelebelenge peaelaela ku dringelresane ki Twaumase; amani ku Twaumase ka tarasaibange.

⁷ Ku Twaumase amia kai: Kawkawluli, kilalra, lri kawrivaku; Iseraylri, lri kukuswaku muswane. Twaumasaku, ka Twaumasesu.

⁸ Kainaku ka ngwalai ki sapatarumaranesu ka waudriwdripi si kaelaela muswane, la kaika ngwalai kwini kaika telratelraisu patarumara kwi Lama ka lrisi.

⁹ Kainaku mwarikai ku amalrane kwini yatalwangane kwi sawvalai ka lwangesu, kai lri arakai kwini yatakivane kwi kiusu;

¹⁰ asi lwiyane kai yakai ubulane ka lawaudriwdripi nakwane; kai yakai ki lalregelrege ka lanilapulapwane mialri ka nakwane.

¹¹ Nakwane patuelre kai langiapalapalai; kai ki kadaengane kai lawaudriwdripi mialri ka nakwane patuelre.

¹² Lu kasilravaku kainaku lri pelaela muswane, asi lwiyane kai kawmasane si yakai adringi nakwane patuelre.

¹³ Bekacaku kane ku beate ki sawvalai ka lwange? Bekacaku ungulu ku erai ki kiu?

¹⁴ Arakaiya ku kiaseasenane tusapatarumarane baai ki Twaumase; lri papiasu ki Abebeelengenga sawlri baai ku kiketeketesu.

¹⁵ Lu kela mulebe ku akwalriane kiatubi madu nakwane; lri palribulaku muswane, lai lri drengedrengeresu nakwane.

¹⁶ Ai ku Twaumase amia kai ki manganganga ka umawmase: Yakai ku kindrisu silrigulrigu ku padradrekaseli? Aneanesu si thuru kawrivariva ki sakiketeketaneli?

¹⁷ Mavalracevacesu kai sabulrwaneli; la pasiwlrisu kai drekaseli.

¹⁸ Lu kipadradresengesu ki sadre la sitalragisu liniane; si taelrelre ki wacapange ka umawmase.

¹⁹ Kwi ngudwisu la kai telrai avavaga ku ngialisiane ka vaga; kwi lridamesu tatavuvuvulrucane.

²⁰ Wacapangesu tulisi ki laretesanesu, la tuvaevasu papia liniane busabusabusu kawriva.

²¹ Paiyasu kilakikai patuelre, la kainaku kawrivariva, lu kidremedremesu mararamau nai amiasu nakwane? Ai lri kaelaelaku muswane, lasu drele patakulringau kilakikai.

²² Kudra marimuru nakwane ku umawmase, kicacaligira kilalra, amani lu amudaku numiane, kadrwa ku umawmase ku lri dulru palribulu.

²³ Sanaka arakai ku kiaseasenane tusapatarumarane amani ku mwasakene nakwane; ku pasalaladha ki drekaseli ku umawmase, lri tara palribulaku.