Lasenai 5 - Ngudradreadrekadhane Ka Sisiu 魯凱語聖經

Kiatubi ku akipalakebane

Tusenai ki Davidi. La baai ki tarasangililuku ki sikatai, la arakai ku patungutungu paungugake.

¹ Tamatama, kilalra kai vagali; kilalra kai dangeli!

² Talialalaili, ka Twaumaseli, kilalra kai lingau ki kitubitubili! Tamatama, lri papiaku muswane kitubi;

³ luka mialrealre kialalrasu kai lingauli; sana lrau ku vai, lri papiaku muswane pelaela kai kidremedremeli, si ukalava ku tatubalreanesu.

⁴ Malrasesu ku ngialisiane ka Twaumase; kaisu palraingi lu utaluvaivai ikai cucubungu muswane ku pasalrivane.

⁵ Mavalracevacesu ku ngiakalrilrigu turamuru ku umawmase; malisisu ki manganganga ka umawmase.

⁶ Ku watavuvulrucu, lri amudusu; ku madalame patueraerai ki umawmase si kadraedrangelre, mavalracevacesu si cilri.

⁷ Kunaku, ngwalai ku adravane ku thalradhanesu, wadulrwaku mudaane ki daanesu; mwasakenaku guruthungane, si ikai ki daanesu sukubu.

⁸ Tamatama, ngiathalringulu nakwane kai labadha; ililukaili pangukakai ki madringelrese ka kadadalranane, la nau ngukakai dadavace ku pasikaisu nakwane kelrete ku kadalranane.

⁹ Ku vaga ki badha kaika akasalrusalrwane; kwi lalasu akabebetethane sikakathane ku kidredredreme. Ku lrulrungu lini mia ki niucaebane ka balriu, ku lridame lini watavuvuvulrucu sikakathane.

¹⁰ Twaumase, tupasalrivana liniane, si kabebetethe ku salrilrigilane lini. Patwaladha ki cucubungusu pakatwase liniane, asi lwiyane makalra ku pasalrisalriu lini, wabaebalrenga muswane.

¹¹ Ku kiapalakebe muswane ku umawmase lri makakawkau kiraragai; kwi lalasu lri kai isadrasadra ku senai kiraragai. Palakebesu ku kathalraisu ku umawmase; kwi lalasu ngwalai muswane si ikai ku patengatengane ka sakiaragai.

¹² Tamatama, patarwamarasu baai ku akaesadhane ki madringelrese ka umawmase; ku kalithanesu mia ki alathare palakebe liniane.