Lasenai 49 - Ngudradreadrekadhane Ka Sisiu 魯凱語聖經

Kulrungane ki satalu ki tacekecekelane

Senai ki zuku ki Kura. La baai ki tarasangililuku ki sikatai.

¹ Laumawmase, kunumi kilalra! Yakawmasane sanaka umawmase, kicacaligira!

² Adravane ka matiakuru ka maesaesaesai, kicacaligira kilalalra.

³ Kai ngudwili lri kawriva kai vaga ki thingalane; kai kidremedremeli lri kidremedreme ku patharwakai ki thingalane.

⁴ Kai calringali lri kicacaligiri kilalalra ku pathalrilriku; lri patungutungaku pathingalane ku pacugane.

^5-6 Ikai ki akwalriane ka vai, la lringulu nakwane ku badha, walringulu nakwane kudra satalu ki tacekecekelane si dradrarane ku tacekecekelane ku umawmase, kainaku lri mukuludru patuelre.

⁷ Kai umawmase kai lri maka sawlri ngilalangai; kai lri dulru arakai ku niakeini tusalangadhane si baai ki Twaumase,

⁸ asi lwiyane ku sabalrithane ki niake makucingalre turamuru. Kai umawmase kai lri maka pawkesa ku sabalrithane lutumane,

⁹ si kai mwadringi ki tadralredralrekane, la palralrawthu kai pacai.

¹⁰ Kusu drela, wapacai ku makulrungu ka kadrwa ku thingale ka umawmase, ku malrigili ka umawmase la mialri pacai; ku lapaisu lini wasuru baai ki mwabaibalrithi makanaelre.

¹¹ Adravane ka nasakadaenganane kwini lalasu, ai ku palralrawthu ka daane lini yai tadralredralrekane; kwini lalasu lri asurunga ikai kwini.

¹² Ku takasanianganane si taabelengane ki umawmase kai lri ngwalai kwini si kai pacai; kwini lasu lrika thadalrane ki waudriwdripi pacai.

¹³ Drela kudra takipadradresengane ki ngiasasudralru ka umawmase; drela kudra tangimiane ki ngwalwadhane ikai ki tacekecekelaneini ka umawmase.

¹⁴ Kwini lalasu mia ki kiu ka nipasudalepanenga muswadriadringi; ku apacadhane lri kamaninga ku taraagu liniane. Ku kinawmasane lini lri ikai swadriadringi kaburau; sana kaliare, ku madringelrese ka umawmase lri akaci liniane.

¹⁵ Ai, ku Twaumase lri palribulu nakwane; lri palribulu nakwane pakidaili ki puku ki apacadhane.

¹⁶ Lu drelesu ki umawmase lu aru ngiradhekanenga si satacekecekelane, madha ngituluku kasamali.

¹⁷ Kwi lasu lu pacai kadrwa ku manemane ku lrika ailukane katwase; ku paisu si tacekecekelaneini kai lri dulru tupalra mwadringi ki tadralredralrekane.

¹⁸ Adravane kasulialialivate ku tapanianianiakaneini, la kidrengedrengere ki umawmase ku tapianeini,

¹⁹ lu alikainga lri tupapalra ki cucungulane kathadaalrane pacai, si lri kai drelenga ki ledra.

²⁰ Ku takasanianganane si taabelengane ki umawmase kai lri ngwalai kwini si kai pacai; kwini lasu lrika thadalrane ki waudriwdripi pacai.