Lasenai 48 - Ngudradreadrekadhane Ka Sisiu 魯凱語聖經

Ziyungu ka cekele ki Twaumase

Senai ki zuku ki Kura.

¹ Ikai ki cekele ki Twaumaseta, ikai ki saniange ka lregelregeini, ku Tamatama madradraunga, lri kidrengedrengere turamuru.

² Ku lregelrege ki Twaumase ka Ziyungu abelenge matisalru si kathariri; ku cekele ki maadrau ka talialalai kiararagai sanaka umawmase.

³ Ku Twaumase yakai ki nikepalane ka cekele, ngiapapathingale ka amani ku akasulivatane ka tamwamwane kipalakebe.

⁴ Ku latalialalai yarubu, si kela kikaruburu Ziyungu lregelrege.

⁵ Kwini lalasu sadrele kai ki cekele mwakuludru si kai thingalenga ku apiane; kwi lalasu siathathiburane mawbebere.

⁶ Kwi lalasu ikai kwini kiaruthuku ki ukuludrane, mia ki twalalalake ka ababai ku kwalriane,

⁷ mia ki kialutu ki twalai tali talrawane ka valrigi ka maadrau ka varukuru.

⁸ Nakialalranga nai ku tapiane ki Twaumase; kaiasasanenga ikai ki Tamatama ka abebeelengenga ki sanaka kwapingi ka cekele ki Twaumase nai, patakamacamacanga nai drele; lri palralrawthunga palakebe kai ki cekele.

⁹ Twaumase, ikai ki daanesu, ngwalringau nai kudra palralrawthu ka sakialibakesu.

¹⁰ Kai yakawmasane ka umawmase lri drengedrengere muswane makanaelre; ku naganesu salraelre kawmasane. Lri arakaisu ku dringelresane rathudu;

¹¹ ku swa Ziyungu ani kiraragai! Ku lacekele ki swa Yuda ani kiraragai! Asi lwiyane ku sasaibanganesu aparamaramau.

¹² Dadavaca ngithalrilringulu ka lregelrege Ziyungu, si asiasipi ku la macuculrudu ku daane ki cekele;

¹³ drela ku raedre ki cekele si kepale, la papia ki mwabaibalrithi pelaela:

¹⁴ Kikai Twaumase yai palralrawlrawthu ka Twaumaseta; lri kamani ku waililuku mitane ka mwabaibalrithi.