Lasenai 47 - Ngudradreadrekadhane Ka Sisiu 魯凱語聖經Tararathurathudu ka abebeelengenga Tusenai ki mwabaibalrithi ki Kura. La baai ki tarasangililuku ki sikatai. 1 Sanaka umawmase, carecara kiraragai! Akwadrava senai, drengedrengere ki Twaumase! 2 Musakena mukuludru ki Abebeelengenga ka Tamatama; amani ku madrau ka talialalai, warathudu kawmasane. 3 Amani ku paakaci mitane ki sanaka umawmase; amani ku parathudu mitane ki sanaka kuni. 4 Pasiakai mitane pilri ku aikaiyaneta ku kadaengane, si tutacekecekelane ki kathalraini ka kawkawluini. 5 Ku Twaumase yakai ki lingau ki kiarararagai mubelenge mutaetalane; ku Tamatama yakai ki elraelrange ki rapa atalialalai! 6 Bwala, tasenai drengedrengere ki Twaumase! Bwala, tasenai drengedrengere ki talialalaita! 7 Ku Twaumase yai talialalai ki kiacaebe ki belenge; taarakai ku senai drengedrengere iniane! 8 Ku Twaumase wanene ikai belenge ki saniange ka taetalane; atalialalai si rathudu ki sanaka kuni. 9 Ku latarasangililuku ki lakuni yarubu makanaelre, lri akawkawlu ki Twaumase ki Aberahame. Ku sakikaruburuburane ki lakwapingi ku alathare Twaumasane patuelre; kathaneini ka sabelenge ki sanaka manemanenga. |