Lasenai 46 - Ngudradreadrekadhane Ka Sisiu 魯凱語聖經

Ku Twaumase tapalra mitane

Tusenai ki mwabaibalrithi ki Kura. La baai ki tarasangililuku ki sikatai. Ku lingau arakai ku “Tawvailekete”.

¹ Ku Twaumase amani ku takilakelakebaneta si pukuta, ka taraparaluralubu lu kipakwalrialrita.

^2-3 Ngwalai kikai, adravane lingilingi kai kadaengane, la ngutukadre kai lalregelrege, si mucilri mwa ki laveke; adravane mia kwidra ku bikabiki, si malalingilingi ku lalregelrege, lri kai nai ngituluku si mukuludru.

⁴ Yakai ku sivale ku kadravane la maililuku ku sakiaragai mwa ki cekele ki Twaumase, wailuku mwa ki taikaiyane ki Abebeelengenga ka Alrivilrivi ka taikaikaiyane.

⁵ Ku Twaumase yakai kwini ki cekele, kwini cekele kai lri mukadrulu lutumane; sana ledra, lri kela ku saparalubane ki Twaumase.

⁶ Ku lakuni lri manugiligili, lai kalrithavulu ku lakuni; ku Twaumase sana avavaga drekase, kai kadaengane lri ngiderenau.

⁷ Ku Tamatama ka abebeelengenga ki sanaka kwapingi watapalra naiane; ku Twaumase ki Yakubu yai amani ku kepale ki cekele nai.

⁸ Bwala, bwala drela kai tapiane ki Tamatama; drela kai matiisamaimali kai tapianeini ikai kai kawmasane!

⁹ Paiyadrengere ku makaruruburane ki kawmasane; wacelra ku labu la ngetele ku laidiri, si arakai ku apwi lama ki laalathare.

¹⁰ Ku Twaumase amia kai: Idrengera kai amakaruruburane, si thingale nakwane ka Twaumase! Lai lri ikaiyaku ki sanaka kuni kimusakene; ikai salraelre kai kadaengane kimusakene.

¹¹ Ku Tamatama ka abebeelengenga ki sanaka kwapingi watapalra naiane; ku Twaumase ki Yakubu yai amani ku kepale ki cekele nai!