Lasenai 45 - Ngudradreadrekadhane Ka Sisiu 魯凱語聖經

Senai lu karudrange ku talialalai

Tusenai ki mwabaibalrithi ki Kura ka sabulrwane ka senai. Saarakaiyane pelaela ku dalamane ka senai. La baai ki tarasangililuku ki sikatai. Ku lingau arakai ku “Bariangalai”.

¹ Kai kidremedremeli waberai ku mathariri ku vaga, la pasikai ki talialalai silrigu ku senai; kai lridameli mia ki taratuhunguhungu kalalruai ku sapacasane.

² Ikaisu ki sanaka umawmase mathaithaariringasu; akwasulrapele ku taavavagavaganesu; ku Twaumase palralrawthu patarumara baai ku akaesadhane muswane!

³ Saniange ka talialalai, silrabwa; swaete muswane kwi lrigu matisalru.

⁴ Pakai ku apalakebane ki patengane ka sabulrwane si dringelresane, ikai ki matisalrwanesu kagaranga papucucubungu! Ku pukusu lrika amani ku kadrwa kulri kiecebe muswane papia kidruanga!

⁵ Ku lrailisu marangisi turamuru, walregese ki avava ki labadha; ku lakuni amalreme ikai cucubungu ki drapalesu.

⁶ Ku patarumara baai muswane ki Twaumase ku taetalane lrika palralrawthu ikai! Arakaisu ku aparamaramavane rathudu.

⁷ Madalamesu ki dringelresane, la kalrasesu kagirimucu ki ngialisiane, lakamani ku pilri si cegecege muswane ki Twaumase, ka Twaumasesu, la pangulwadhane muswane ku sakiaragai, ka silrialribate ki palrapalra.

⁸ Ku sangiragelananesu asabalriane ku tasangulremanane ki sasulravane, aluise, karangekange; ikai ki niara valisane ki zu tudaane yakai ku tarapatungutungutungu pasikaikai muswane patungutungu ku matidadalame.

⁹ Ikai ki lataelrelresu yakai sanaka mwakaikai ki lakuni; ku kataelrelreanelringa ki talialalai siakingi ku sangiragelananeini si acegecege ikai tali vanale ki taetalanesu.

¹⁰ Talialaladhane ka kiarakerakete, kicacaligira kilalra kai vagali: Karimura ki tatwaladhanesu ka zuku si laretesanesu!

¹¹ Ku thariranesu lri mubaisi muswane ku talialalai; amani ku tawkisu, lri pasalaladhasu iniane.

¹² Lri kela bulribulri tuswalupu ku swa Tayre; ku maesaesaesai ku laumawmase lri kikathaithariri muswane.

¹³ Ikai ki taikaikaiyane ki talialalai, ku lalake ki talialalai ka ababai ala tathaithariri turamuru! Ku laimaini niarakaiyane ku valrai ka kingi pacase.

¹⁴ Kwi alisu sialaimai ku mathaariri, si kililuku mucucubungu ki talialalai; kudra twapapapalra iniane ku laababai la mialri kidrele.

¹⁵ Kwi lalisu makitwa kirararagai turamuru, si karededele mudaane ki daane ki talialalai.

¹⁶ Talialalaili, lri takaalra ku mwabaibalrithi muswane ku lri mucungulu ku taetalanesu; lri cegecegesu liniane si rathudu kai kawmasane.

¹⁷ Kai senaili lri kai kaela palralrawthu ku takimatikaiyanesu; sanaka umawmase lri drengedrengere muswane palralrawthu.