Lasenai 44 - Ngudradreadrekadhane Ka Sisiu 魯凱語聖經

Kiatubi ku akipalakebane

Tusenai ki mwabaibalrithi ki Kura ka sabulrwane ka senai. La baai ki tarasangililuku ki sikatai.

¹ Twaumase, kialalranga nai, peaelaelaanga naiane ku cucungulane nai, saka siaswalane sakamaniana lini ku tapianesu ku maadrau ka awngane:

² Ngiakakamanisu ka pakatwase ki maelane ka zuku, la ikaisu ki kadaengane lini lapu ki kawkawlusu; pathavungusu ki lakuni, si pangiradhekane ki kawkawlusu.

³ Ku kawkawlusu kai satalu ki lrabu malra kwini ki kadaengane, la kai ngisasatalu ku puku si akaci; satalu ki tabalanganesu, ki pukusu, ki tatapalranesu, asi lwiyane madalamesu liniane.

⁴ Kusu yai talialalaili, Twaumaseli; paakacisu ki kawkawlusu.

⁵ Satalu nai ku pukusu, la pamaki nai ki badha; satalu nai ku tatapalranesu, la dulrapingi nai ki badha.

⁶ Kainaku lri satalu ki buli; ku dramuli mialri kai dulru palribulu nakwane.

⁷ Ai palribulusu naiane pakidaili ki badha, si pamaki ki magirimurimucu kalisilisi naiane ka laumawmase.

⁸ Twaumase, lrika tadrengedrengedrengerane nai muswane; lri palralrawthu nai kiaseasene muswane.

⁹ Kaiasasane wacilrisu naiane, la kitusinalremelreme nai; kaisu marederedelenga ki lakwapingi nai kikaruburu.

¹⁰ Piacucubungusu naiane ki badha pamaki, kudra malisilisi naiane ku badha la nguelre ravase naiane.

¹¹ Pangiamiasu naiane ki kiu kipapacai, la pakatwasesu naiane mwa ki maelane ka kuni.

¹² La malrasu tuduai kilangai ki kawkawlusu, kadrwa ku patwalaisu liniane malra ku amuesadhane.

¹³ Pakamanisu naiane kudra takaelaelaelane tusinalrelreme ki lapasiagiagisi; kwi lalasu twameameamelrace naiane, si ulralrakai naiane.

¹⁴ Pakamanisu naiane ku tarakiwlralralrakai ki lakuni; ku lakuni papia naiane vetevete ku awlru si ulralrakai.

¹⁵ Takitusinalremelremeeanaku, kai telrai kikabungu ki akainwane,

¹⁶ asi lwiyane kialalra madu ku lingau ki twasinalrelreme si mabebetethe, la drele madu ki badha si kiaececebe nakwane ku umawmase.

¹⁷ Adravane ka kadruana ku takarimurane nai muswane, la kai nai baebalre ku sakiketeketanesu, ai kiapadradresenge nai kilakikai patuelre.

¹⁸ Kai nai apapiyaiyana kai kidremedreme nai muswane, la ka kadruana ku takiecebane nai ku drekasesu,

¹⁹ la piasu kai cilri naiane pikai ki lawaudriwdripi, si cilrisu naiane pikai babiabila ki apacadhane.

²⁰ Twaumase nai anaka marimurunga nai muswane, si papia ki twaumase ki drumane ka kuni inulri,

²¹ nai tara ka wadrelesu, asi lwiyane wadrelesu paladeke ku niseketane ikai ki kidremedreme ki umawmase.

²² Ai ngwalai muswane, twarakete nai kiculuculu kipapacapacai; amaninga nai kudra mwakalavalava ku akiculwane ka kiu.

²³ Tamatama, pacunanga! Asu kasipelrenge? Ngidrakala, madha ka palralrawthu cilri naiane!

²⁴ Asu ngitatamenge kwi lringawsu si kai marasikai naiane? Kiatubi nai muswane ngulringava kai sakwalrialri nai si takidredredrepetane nai!

²⁵ Twabakebake nai ikai cakena, kilrumai si tubakebake ikai daedae.

²⁶ Kiatubi nai muswane ngidrakala si paralubu naiane; asi lwiyane yakai kwi palralrawthu ka sakialibakesu, kiatubi nai muswane palribula naiane!