Lasenai 42 - Ngudradreadrekadhane Ka Sisiu 魯凱語聖經

Mwasakadrusa ka hungu (Lasenai 42–72) Inulri ki acaicaicali ka umawmase

Tusenai ki mwabaibalrithi ki Kura. La baai ki tarasangililuku ki sikatai.

¹ Twaumase, akuliaku muswane, mia ki salawngane lu akuli ki mangangerece ka acilai vaalru.

² Palralrawthu panianiake ka Twaumase, siadramaku muswane; lwiganenga ala lri mwaku cucubungu muswane sukubu?

³ Lukavaiane lukamaungu watubitubiaku, atalekengali kai lrese; kai watelrai kivaga nakwane ku labadha: Ku Twaumasesu yakainu?

⁴ Mabareengeraku ku siaswalane ka vai, lu pakeela inu ku tubi ki kidremedremeli; sakamani kwidra, maredelaku ki laumawmase papia ki daane ki Twaumase, mailuku ku sakiararagai kalri mwa drele ki sanianiangenga, tarakadalranane kirararagai drengedrengere ki Twaumase.

⁵ Anau mia kikai tubitubi? Anu mia kikai ngupukuanenga? Lri sudralrwaku ki Twaumase, si pelana drengedrengere iniane; amani ku palribulu nakwane ka Twaumase.

^6-7 Ikai ki taacaicaicalianeli, watubi kai kidremedremeli, ngwalai kikai la ngulringavaku ki Twaumase. Ku bikabiki ki atubiane pawathene nakwane, ku lrithavulane mia ki lriau guruguru, mia ki tuturu kavai lregelrege Heremunge, si Mizare lregelrege mwaludru papia kadravane Yuredange.

⁸ Lukavaiyane, ku Tamatama ani pathingalane ku palralrawthu ka sakialibake; lukamaungu, lri drengedrengeraku si inulri ki patarwamara nakwane ku niake ka Twaumase.

⁹ Amiaku kai ki palakebe nakwane ka Twaumase: Asu karimurunga nakwane? Anau ngithanga kitulilisi ki badha? Ani kai ateateke ku akwalriane?

¹⁰ Ku tusinalremeane lini wadrepete pakaburau nakwane; kwi lalasu kai watelrai kivaga nakwane: Yakainu ku Twaumasesu?

¹¹ Anau mia kikai tubi? Anau mia kikai ngupukuanenga? Lri sudralrwaku ki Twaumase, si pelana drengedrengere iniane; amani ku palribulu nakwane ka Twaumase.