Lasenai 41 - Ngudradreadrekadhane Ka Sisiu 魯凱語聖經

Inulri ki tangea ka macaeme

Tusenai ki Davidi. La baai ki tarasangililuku ki sikatai.

¹ Ku makalithi ki matiakukuru ka umawmase yakai ku akaesadhane turamuru! Lu ikai ki akwalriane, ku Tamatama lri sirapale liniane.

² Ku Tamatama lri palakebe liniane, si paudripi ki niake lini, la paikai kai ki kadaengane kisupisupilri ku akaesadhane; ku Tamatama kai lri cilri liniane, si pikai liniane ki alrima ki badha.

³ Kwi lalasu lu kacaeme, ku Tamatama lri sulrau pawdringai liniane; lri pasiwlriwlriane pakathariri ku kinawmasane lini.

⁴ Nakiatubiaku iya kai: Tamatama, pasalrivaku muswane; kiatubiaku muswane kakalithaili, si sulrau pawdringai nakwane.

⁵ Ku badhali twalililisi mapelaelaela iya kai: Ka lasu lri pacai lwigane si lri kikarimurunga?

⁶ Ku wakela drele nakwane, kai mathariri ku takidremedremane; kwi lalasu wasaruburubu ku malisi ka lavaga, si la pasasasarau papia kidruanga.

⁷ Kudra la malisilisi nakwane ku umawmase matetetenge; kwi lalasu la piapia ku akabebetethane nakwane.

⁸ Kwi lalasu amia kai: Ka lasu lri pacainga; kai lri maka ngidrakalenga ki tapeapecane la iyaiya.

⁹ Adravane ka katalragianeli, ka wakanenga ku agali ka umawmase, mialri ara drapale tetere nakwane.

¹⁰ Tamatama, kiatubiaku muswane kakalithaili, la nau mudringai kathariri ku kinawmasane, si bilri ki badhali.

¹¹ Kiatubiaku muswane madha paakacikaci ki badha, la nau thingale ala ka madalamesu nakwane.

¹² Lri paralubusu nakwane, asi lwiyane mabulaku si dulru ngiraruthuku; lri pakapalralrawthusu nakwane icucubungu muswane marasikaikai.

¹³ Ku Tamatama ka Twaumase ki swa Iseraylri ani kidrengedrengere! Ka palralrawthu si kakadrwa ku talikaiyane! Amingi! Amingi!