Lasenai 40 - Ngudradreadrekadhane Ka Sisiu 魯凱語聖經

Sadrengedrengerane ka senai

Tusenai ki Davidi. La baai ki tarasangililuku ki sikatai.

¹ Kiaadilaku ukalava ku saparalubane ki Tamatama; la kilalra ku kitubili.

² Patwalai ki beneke si valrulrange alra bilibili nakwane, wamalra nakwane si pasutelrai pikai belenge ki alrisapesape, la kasulivataku sutelrai.

³ Wabulru nakwane senai ku bavane ka senai, si senai ku sadrengedrengerane ki Twaumase. Takaalra ku wadrele ku umawmase la isaselebane si musakene, si mubangalre satalu ki Tamatama.

⁴ Ku savaeva ku kidremedreme satalu ki Tamatama ka umawmase mwaesai turamuru! Kwi lasu kai papia ki samiamiange, la kai tupapalra ki wasukubu ki kaika patengane ka twaumase.

⁵ Tamatama ka Twaumaseli, pasiakaisu naiane pia ku makaalra ku maadrau ka awngane; aneane ku lri dulru kiramau muswane! Ku pasikaisu naiane kidremedreme ku matiasamali ku apiane nau asipi lu iyane kaika amaka asiasipane.

⁶ Malrasesu ki sapatarumarane ka lawaudriwdripi si lataleke; malrasesu ki Lama ka lrisi si Balrithane ki pasalrivane ka lrisi. Ai wabaaisu nakwane ku wadulru kilalra ka calringa,

⁷ lakamani ku tubalreli iya kai: Kawvadhaku. Ku sapelaelanesu nakwane nipacasane pikai ki hulrice ka hungu patuelre.

⁸ Twaumaseli, kiaragadhaku turamuru paluludu ku takidremedremanesu! Ku sabulrwanesu piakaiyaku ki kidremedremeli.

⁹ Tamatama, ikai ki tayelrelreane ki kawkawlusu, peaelaelaelaku ku tapalribulanesu; wathingalesu, lri kainaku telrai ku apelaelane pasalraelre.

¹⁰ Kudra matiakiragai ka tapalribulanesu kainaku ngiatatu nakwane, tapelaelaelaanaku ku takapatengatengananesu si taparalubanesu; ikai ki tapaangale ka tayelrelreane, kainaku wabalai ku sakialibakesu si takapatengatengananesu.

¹¹ Tamatama, wathingalaku ka lrika palralrawthusu kai sawlringa ku kilibakanesu nakwane; ku takapatengatengananesu si kai lri akabalribalrithi ka sakialibake amaani ku ulrudruli.

Kiatubi ku akiparalubane ka inulri

¹² Kiangithalringulaku ki kaika amaka asiasipane ka amatikurwane; ku tapasalrivaneli padalinga nakwane, la kainaku maka paswabelengenga; ku pasalrivaneli makakalra ki isiwli, maulrawnga ku garanganeli.

¹³ Tamatama, kiatubiaku muswane palribulaili! Kiatubiaku muswane bwala kirimwa paralubu nakwane!

¹⁴ Ku kiasanu papacapacai nakwane ani agulrane si kai thingalenga ku apangimiane; kudra kiarararagai ku tamatikurwaneli ku umawmase ani kasulri si kiarubwane.

¹⁵ Kudra mwalralralrakai nakwane ku laumawmase ani makitu mukuludru si mawbebere.

¹⁶ Ku wakela mucucubungu muswane sanaka umawmase ani kiraragai makanaelre! Ku akuli ku tapalribulanesu sanaka umawmase ani kai telrai iya kai: Ku Tamatama saniange turamuru!

¹⁷ Twaramuraku ka kadrwa ku paralubu, ai Tamatama, makaalithiananasu nakwane. Amanisu ku takiparalubaneli, ku takipalribulribulaneli; Twaumaseli, kiatubiaku muswane madha ngiabalabalai!