Lasenai 4 - Ngudradreadrekadhane Ka Sisiu 魯凱語聖經

Tainulrinulriane ki maungu kitubi ku akiparalubane

Tusenai ki Davidi. La baai ki tarasangililuku ki sikatai, la arakai ku patungutungu paungugake.

¹ Twaumaseli, ka tara pusakaikai nakwane! Lu kitubiaku muswane, pukawnangaili. Sa ikaiyaku ki lamatikurwane naparalubungasu nakwane; kaiasasane kakalithaili, si kilalra kai inulrili!

² Kunumi ka laumawmase, lri pakela numi lwigane tusinalrelreme nakwane? Akuli numi kudra kaika patengatengane, la saladha numi kudra nitavuvulrucane, lwiganenga lri palikaai numi?

³ Thingala ku Tamatama wapilringa ki twakapatengatengane ku takisuswane ka umawmaseini; lri tara kialalra ku kitubili.

⁴ Kipapawlringava si mukuludru, la kai pasalriwnga; ikai ki tapeapecane si kababitinginga, kiadredredreme madu.

⁵ Papia ki Tamatama patarumara ku naika apatarumaraane ku sapatarumarane, si savaeva ku kidremedreme satalu iniane.

⁶ Takaalra ku umawmase ku amia kai: Siadraama nai ku atarumarane ku akaesadhane! Tamatama, arakaiya ku thalradhanesu paledra naiane!

⁷ Ai ku patarumarasu nakwane ku akiragadhane walribate ki pangiaesai kitaleke, twathariri tubava si kisupisupilri kirararagai.

⁸ Sana apecaku, waerekaku kasipelrenge; Tamatama, kathanesu ku wadulru palakebe nakwane kasuliivate.