Lasenai 39 - Ngudradreadrekadhane Ka Sisiu 魯凱語聖經

Tangitatasiwlriwlriane ki kiapadradresenge ki amatikurwane

Tusenai ki Davidi. La baai ki tarasangililuku ki sikatai ka Yedutune.

¹ Amianga naku kai: Lri kipapawlriingavaku kai kakwakudhaneli, si kai papasalriu ki lridameli; lu icucubungu nakwane ku manganganga ka umawmase, lri iceelrebaku kai avavagavaga.

² Yasaseleebanaku, kai kawriva ku niaku vaalanenga, adravane ka mathariri ka vaga kai putaluvaivai ki ngudwi. Ai kai sakwalrialrili arwa pakilringau;

³ swaete ki kidremedremeli kai thekelrane. Lu aru kidremedremaku arwa mukuludraku, la kainaku beserenga si kivaga:

⁴ Tamatama, thaininu ku lragiane kai niakeli? Lri pacadhaku lwigane? Kiatubiaku muswane ala pelaela, ku alikaiyaneli lri kelanga lwigane?

⁵ Twaedreekanesu kai niakeli! Lu drelesu, ku tapanianiakaneli ku caili maru kadruanga. Kai niake ki umawmase maru nikingivaalane manianiake;

⁶ ku tapanianiakane mia ki lrapucu. Ku nikwalrialriane patuelre ungawngau patuelre; kwi lasu waruburubu ku tacekecekelane, ai kai wathingale lu lrika aneane ku lri kisupilri.

⁷ Tamatama, lri dulrwana naku sidrama ku manemane? Lri satalwaku muswane sikakathane.

⁸ Kiatubiaku muswane palribulaili pakidaili ki apasalrivane patuelre, madha palrailraingi ki makulrungu ka umawmase pulrialrivale nakwane.

⁹ Lri isaselebanaku, kai avavaga adravane ka niaku vaalane, asi lwiyane paiyasu kikai pakwalri nakwane.

¹⁰ Kiatubiaku muswane madha kaelaelanga pathavungu nakwane; ku talrumadhanesu wateateatekenga naku.

¹¹ Arakaisu ku sakaelaelane pathavungu ki pasalrivane ki umawmase, mia ki calumuku ka pakaburau patuelre ki kadalameini. Unu, kai taikawmasanane maru nisangu vavaalane manianiake.

¹² Tamatama, kiatubiaku muswane kilalra kai inulrili, la kirarakete kilalra kai kitubili. Lu tubitubiaku murikai muswane, kiatubiaku muswane paralubaili. Amaniaku ku badhabadhasu, mararamau ki lacucungulane ka walribalribate ka badhabadha sikakathane.

¹³ Kiatubiaku muswane pacepaili, sa kainaku pacadhana nau dulru ikai ku tikiane ku akiraragadhane.