Lasenai 38 - Ngudradreadrekadhane Ka Sisiu 魯凱語聖經

Inulri ki kiapadradresenge ku akwalriane

Tusenai ki Davidi ka saarakaikaiyane ngulrialringau.

¹ Tamatama, kiatubiaku muswane madha kalisilisi si kaelaela nakwane; madha ikaikai ki elathanesu si pathavungu nakwane.

² Kwi lrailisu watengadre mwadringi nakwane; kwi alrimasu pangiacaaeme drepete nakwane.

³ Kwi elathanesu kadrwanga ku mwadringadringai kai beateli; kai tapasalrivaneli mababuraunga naku.

⁴ Mwatheneaku ikai ki lriau ka pasalrivane; ku telregane ki pasalrivane wadrepete nakwane.

⁵ Ngwalai ki kulrunganeli, kai dulali maburaburau si sangubalre.

⁶ Ngwalai ki sakiangeangeli si kacukulu; twaraketaku tubitubi.

⁷ Kwalamaku ki culwane, la ka kadrwanga ku mwadringadringai kai beateli.

⁸ Kiadulrunga naku si kadrwanga ku pukuli, ateateatekenga kai niake; watubi kai kidremedremeli, dadange ki sakwalrialri.

⁹ Tamatama, wathingalesu kai kidremedremeli; la kilalrangasu kai daangeli.

¹⁰ Mwakuludraku turamuru, ka kadruanga ku puku; kai macali kadrwanga ku tharirane.

¹¹ Ku latalragilragili si pasiagiagisili kai wathethethengetenga ki caemaneli; adravane ka wacekecekeleli mialri mubere daailinga nakwane.

¹² Ku wasilasilape ki niakeli ku umawmase pwalravathe nakwane; ku kiasanu kabebebetethe nakwane ku umawmase akwalisi kukuludru, twarakete kisanu arakaikai ku tavuvulrucane kiecebe nakwane.

¹³ Miaku ki macele, kai maka kilalra, mia ki mamenene, kai dulru kawriva;

¹⁴ la miaku ki kai maka kialalranga ka umawmase, kai maka ngipapasikai tubalre kawriva.

¹⁵ Tamatama, satalwaku muswane; Tamatama ka Twaumaseli, kiatubiaku muswane tubalreaili.

¹⁶ Madha ngwalalai kai tamatikurwaneli si pakiraragai ki badhali; madha ngwalalai kai taamakianeli si paputariri ki badhali.

¹⁷ Kai akwalriane tatupapapalrane nakwane, lri kalringacenga naku si tubakebake.

¹⁸ Ngiathathingalaku kai pasalrivaneli; ngwaladhaku kai tapasalrivaneli si kwalrialri kai kidremedremeli.

¹⁹ Ku badhali matiacaeme ku tacebeane si kalilisi turamuru; ku wavutha kalisi nakwane ku umawmase takalra turamuru.

²⁰ Ku ara lisiane bilri ki tharirane ku umawmase kiaecebe nakwane, asi lwiyane lri ngukakaiyaku ki makalecege ka kadalranane.

²¹ Tamatama, kiatubiaku muswane madha cilricilri nakwane; Twaumaseli, kiatubiaku muswane madha kidaidaili nakwane.

²² Tamatama ka takipalribulribulaneli, kiatubiaku muswane bwala kirarimwa paralubu nakwane!