Lasenai 36 - Ngudradreadrekadhane Ka Sisiu 魯凱語聖經

Ngilisianane ki umawmase

Tusenai ki sasiakawlu ki Tamatama ka Davidi. La baai ki tarasangililuku ki sikatai.

¹ Kai pasalrivane ikai ki kidremedreme ki tangangangace ka umawmase pasapukwane iya kai: Satumanane ki Twaumase, madha mukuludru iniane!

² Ku pasalrisalriu ka umawmase ngiatatwabelenge ngitatwadrau, lu kidremedreme miakau kai lri thingale ku Twaumase, miakau kai lri pathavungu ki pasalrivaneini.

³ Swaete ki ngudwini ku ngialisiane si tavuvulrucane; kwi lasu maulrawnga ku lrigilane ki mathariri ka awngane.

⁴ Lu apece kwi lasu kiadredredreme ku apiane ku ngialisiane; ngialisianenga ku kakwakudhaneini, kai wacilri ki ngangacane.

Tharirane ki Twaumase

⁵ Tamatama, ku kai akabalribalrithi ka sakialibakesu wadaruru subelebelenge; ku takapatengatengananesu walribate ki taalikaiyane ki ememe.

⁶ Ku dringelresanesu mia ki lalregelrege acegecege; ku taturingaringavanesu mia ki valrulrange kakucingalre lekete. Tamatama, kai umawmase si nilapulapwane ka waudriwdripi siarapalesu patuelre.

⁷ Twaumase, ku kai akabalribalrithi ka sakialibakesu tinukucingalrane turamuru! Kai laumawmase yakai tailebe ki sapakepakesu kidringai ku akipalakebane.

⁸ Kwi lalasu yakai ki daanesu kisupisupilri ku niputalekane; paungulusu liniane kudra berai ka acilai ka sakiaragai.

⁹ Amanisu ku berai ki niake; ikai ki tapaledranesu wadrele nai ku ledra.

¹⁰ Kiatubiaku muswane madha retege ku asirapalanesu ki wathingale muswane ka umawmase; kiatubiaku muswane pacungula marasikai ki madringelrese ka umawmase.

¹¹ Madha palrailraingi ki ngiakalrilrigu ka umawmase tusinalrelreme nakwane; Ani kai pakatwatwase nakwane ku manganga ka umawmase.

¹² Drela, ku manganganga ka umawmase twabakebakenga; kwi lalasu twabakebake ikai kavai, lri kai maka acegecegenga.