Lasenai 35 - Ngudradreadrekadhane Ka Sisiu 魯凱語聖經

Kiatubi ku akiparalubane ka inulri

Tusenai ki Davidi.

¹ Tamatama, kiatubiaku muswane kieceba kudra la kiaececebe nakwane ka umawmase; kiatubiaku muswane kikarubura kudra lri kikaruburu nakwane ka laumawmase!

² Kiatubiaku muswane malra ku alathare, ku adreme, la ngidrakale paralubu nakwane.

³ Kiatubiaku muswane cidinga kwi idirisu, kumugu, si kidresenge kikaruburu ki wasaladhaladha nakwane ka labadha. Kiatubiaku muswane papiaili kiketekete: Lri palribulusu nakwane.

⁴ Ku kiasanu papacapacai nakwane ku umawmase ani ngupukwane si kiarubwane! Ku kiadremedremedreme ku akabebetethane nakwane ku umawmase ani agulrane si kai thingalenga ku apangimiane!

⁵ Ku sasiakawlu ki Tamatama lu saladha liniane, kwi lalasu ani mia ki lrapi kipalai ki valrigi.

⁶ Ku sasiakawlu ki Tamatama lu papacai liniane, ku tadadavacane ku kadalranane ki lalasu ani kadradrimiti kathathulridri.

⁷ Kwi lalasu kadrwa ku tamukaiyane lini ku kakudhane si paipai nakwane pulravathe; kwi lalasu walrubange pakai ku apwalrane nakwane.

⁸ Ku amatikurwane ani pangitutuluku mulebe mwa liniane; kwi lalasu ani kilrepelrepe ki lravathe lini, si mulrubangane ki lruku lini.

⁹ Lukamani kwidra, lri ngwaladhaku ki Tamatama si kiraragai, ngwalai ku tapalribulanenga nakwane si kiraragai.

¹⁰ Lri pasingi kidremedremaku papia ki Tamatama iya kai: Tamatama, aneane kulri dulru kiramau muswane? Palakebesu ki twaramuru ku kaika akitusinalrelremeane ki magarange ka umawmase; palakebesu ki matiakukuru ka umawmase ku kaika akitavuvulrucane ki taratavuvuvulrucu.

¹¹ Ku manganga ka umawmase wacapange akasi, la kaelaela draidralrili nakwane ku kaika pasalrivaneli.

¹² Kwi lalasu ara lisiane bilri ki tharirane, la tangeangeeaku kwalrialrialri kai maka sidruru.

¹³ Ai, kwi lalasu lu kacaeme, sialaimadhaku ku kaimadhane si pasikai liniane tubi, walaisaku, si guruthungane pasikai liniane inulri;

¹⁴ lu marasikaiyaku liniane, mia ki talragi, mia ki betakane, ngiaukucaku adirivane tubi, mia lu pasikaiyane ki tina madu adirivane tubi.

¹⁵ Ai, sakipadradresengaku ki akwalriane, kwi lalasu kiaragailringa si irubu mulralralrakai nakwane; ku kaika thingaleli ka umawmase walrumai nakwane, la kai telrai lrumai nakwane.

¹⁶ Mararaamau ki kadrwa ku kurwane ka umawmase ka twasinalrelrelreme ki pilapilai, kwi lalasu apararitaitaiti nakwane, kalisilisi nakwane.

¹⁷ Tamatama, lri pakelasu lwigane ka taneneane dredredrele si kai kicapili? Kiatubiaku muswane palribulaili pakidaili ki tulilisi lini, patwaladha kilakikai ki ngudwi ki raiyungu palribulu ki niakeli!

¹⁸ Lukamiyaiya kikai, lri ikaiyaku ki tayelrelreane kiaseasene muswane; lri ikaiyaku ki tairubwane ki laumawmase senai drengedrengere muswane.

¹⁹ Madha palrailraingi ki lawatavuvulrucu ka badha pakiraragai lu amakiaku. Madha palrailraingi ki lawavutha kalisi nakwane ngwalai ki takwalrianeli si malrikalrikace ku maca.

²⁰ Kwi lalasu kai twatharithariri lu kawriva, la kawriariva cacapange tulisi ki madalame ki rathudane ka laumawmase.

²¹ Kwi lalasu sana kawriva apakisaibangane: Aha, wamaca nai drele!

²² Ai Tamatama, wadrelesu, kiatubiaku muswane madha iceelrebe; Tamatama, kiatubiaku muswane madha yadaaili acegecege si dredredrele kai marasikai nakwane.

²³ Twaumase, kiatubiaku muswane pacuna si pasikai nakwane kawriva; Tamatama, kiatubiaku muswane ngidrakala si pusakai nakwane.

²⁴ Tamatama ka Twaumaseli, kiatubiaku muswane singikaiya ku dringelresanesu la pelaela ka kadrwa ku pasalrivaneli; madha palrailraingi ki badha papia nakwane putariri.

²⁵ Madha palrailraingi liniane kidremedreme iya kai: Aha! Ala amani kai ku murikaita! Madha paiyaiya kai liniane: Wamudungata iniane!

²⁶ Kudra latwapeaperavane ki kwalrialri madu ani agulrane si kai thingalenga ku apangimiane! Kudra la sapupukwanaku amiamia nakwane ku umawmase ani kasulri si kiarubwane!

²⁷ Kudra la ngwalai ku takitukakadrwane ku pasalriwli si kiragai kasasa ku umawmase, ani senai kiraragai! Kwi lalasu ani kai telrai ku aiyane kai: Kudra madalame drele ki sasiakawlu lu siku ka Tamatama lri kimusakene.

²⁸ Luka ngimiyaiya kai, lri putaluvaivadhaku pelaela ku dringelresanesu; lai lri turaketaku senai drengedrengere muswane.